Дачæты амнистийы рæстæг кæронмæ архæццæ кæны

«Амнисти» ныхас дачæтимæ ничи сбæттдзæн. Фæлæ уый у сæрмагонд программæ. Адæмæн æнцон кæны, сæ бæстыхæйттæ закъонмæ гæсгæ сæхиуыл сфидар кæнынæн. Бирæтæ зæгъдзысты, уый зын саразгæ у, зæгъгæ. Фæлæ Росреестры специалистты ныхæстæм гæсгæ, хъуыддаг бирæ тухи æмæ рæстæг нæ ахсы. Йæ дачæ приватизаци чи нæма скодта, уыдонæн ма мæйы бæрц рæстæг баззад. Куыд æмæ цы хъæуы ацы хъуыддаг саразынæн, уый уын радзурдзæн нæ уацхæсджыты ‘рмæгæй. Дачæты амнистийы тыххæй дзурын райдыдтой 2006-æм азы сентябры. Ныхас цæуы, хи хæдзæртты арæзтадæн цы зæххытæ радих кодтой, уыдоныл цы объекттæ ис, уыдон хиисбонадыл ныффысыны процедурæ фенцондæр кæныныл. Мæйæ къаддæр рæстæг ма баззад программæйы кæронмæ. Цыд 10 азы дæргъы. Уыцы рæстæгмæ дачæты хицæуттæй æрмæст дæр се ’рдæг скодтой приватизаци сæ бæстыхæйттæ. Болæтаты Фатимæйæн ацы хабар йæ къухы бафтыд æнцонæй. Æрæмбырд кодта хъæугæ гæххæттытæ æмæ закъонмæ гæсгæ йæ зæхх йæхи баци. Дачæты амнистийы программæмæ хауынц уыцы бæстыхæйттæ, кæцытæ лæууынц хи хæдзæртты æмæ гаражтæ аразынæн, стæй хи хæдзарад дарынæн кæцытæ сбæрæг кодтой, уыдон. Хиисбонад дарæг суæвын æнцон у. Хъæуы æрмæст дæр цыфæнды бардæттæг гæххæт æмæ арæзтадон куыстытæн техникон пълан Росреестрмæ бадæттын. Гобеты Сергей; паддзахадон регистрацийы отделы разамонæджы хæдивæг: «Зæгъын хъæуы уый, æмæ зæххы хæйттæ хиисбонадыл ныффысыны процедурæ баззад куыд уыд, ахæмæй. Исты зæронд бардæттæг гæххæттытæ кæмæ ис, уыцы адæмæн сæ бон у уыдоны ‘руаджы сæ зæхх сæхиуыл сфидар кæнын. Сæ юридикон тых сæфт нæу. Хъæуты уыцы гæххæттытæм хауы хæдзарадон чиныгæй рафыст. Æмæ уыцы бартæ сфидар кæнынæн æмгъуыд нæй.» Дачæты хиуыл ныффысыны фадат ис алы бирæвæрсыг центрты дæр. Бирæ йын нæ хъæуы: телефонæй кæнæ центры æрбацыды рæстæг сбæлвырд кæнын, дарддæр - деклараци скæныныл бакусын. Уый сфидар кæнын хъæуы алы бæстыхайæн дæр. Æнхъæлмæ кæсын бирæ нæ бахъæудзæн - 30 боны онг. Рæстæг ма ис. Биджелты Бертæ, Томайты Аланæ, Гæбуаты Артур, Александр Левченко, Ирыстоны хабæрттæ. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv