Ивддзинæдтæ закъæттæм

Республикæйы мадæлты капиталы хæстæ фидын райдайдзысты 2019-æм азæй къæпхæнгай. Ахæм ивддзинæдтæ хаст æрцыдысты 2019-æм - 2020-æм азты республикон бюджеты закъоны проектмæ. Уый тыххæй абон Парламенты æмбырды фехъусын кодта республикæйы экономикæйы министры хæстæ æххæстгæнæг Дзæгъойты Алан. Закъоны проектмæ гæсгæ ма 20 милуан сомы радих кæндзысты, Сабырдзинады проспекты цы Мидхъуыддæгты министрады училище ис, уый бæстыхай сцалцæг кæнынæн. Уæлæмхасæн 5 милуан сомы та ратдзысты Беслæны уæлмæрдтæ "Город ангелов" æмбæлгæ уавæры дарынæн. Республикæйы Парламент ма æркаст фæндаггон фонды закъоны проектмæ дæр. Фæндаггон фæтк фехалынæн цы ивартæ фыст цæуынц, уыдон республикæйы бюджетæй æрвыст цæудзысты фæндæгты фондмæ. Видеоцæстдарды камерæтæ Цæгат Ирыстоны фæндæгтыл кусынц июлæй нырмæ. Уæдæй нырмæ ивартæ баисты 70 минæй фылдæр. Хъалонтæ куыд æмбырдгонд цæуынц, уымæ гæсгæ нæ республикæ ахсы дыккаг бынат Цæгат Кавказы регионты æхсæн. Фыццаг бынаты ис Стъараполы край. Уый тыххæй та депутаттæн радзырдта цæстдарæн-нымайæн палатæйы сæрдар Хъæлыцты Инал. Ивддзинæдтæ ма бахастой Цæгат Ирыстоны хъæдтæй пайда кæныны тыххæй республикон закъонмæ дæр. Ныр хицæн адæймæгтæн бар уыдзæн, уæлдай цæстдард цы бынæттæм цæуы, уым дæр хъæдæрмæг ракæнынæн. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv