Сергей Меняйло æмæ Хуссар æфсæддон зылды æфсæдтæн къамандыгæнæг Алексей Авдеев фембæлысты, сæрмагонд æфсæддон операци æххæстгæнгæйæ чи фæмард, уыдоны бинонтимæ. Республикæйы сæргълæууæг тæфæрфæс ракодта хъæбатырты хиуæттæн. Радта сын, æхсар æмæ удуæлдайдзинады тыххæй æфсæддонты цы Лæгдзинады ордентæ æмæ Жуковы майданæй схорзæхджын кодтой, уыдон. "Уæ маст уын чи фæрогдæр кæна, ахæм ныхæстæ ссарæн нæй. Фæлæ йæ хъуамæ зонат: уæ фырттæ, æмкъæйттæ, æфсымæртæ — æцæг хъæбатыртæ сты, тыхст бонты сæхи нæ бамбæхстой. Уыдон сты, сæрыстыр кæмæй стæм, ахæм фæсивæд!" - загъта Сергей Меняйло. Сæргълæууæг ма куыд фæнысан кодта, афтæмæй муниципалитетты разамонджытæ æмæ регионы социалон службæты раз лæууы фыццаградон хæс — сæрмагонд æфсæддон операци æххæстгæнгæйæ чи фæмард, уыцы æфсæддонты бинонтæн хъæугæ æххуыс кæнын.