Дзанайты Азанбеджы номыл нывкæнынады училищæйы ацыд ирон «Нартиадæйы» баст лекци

«Нарты бæстæм дуар». Ахæм сæргондимæ лекци ацыд Дзæуджыхъæуы Дзанайты Азанбеджы номыл нывкæнынады училищæйы. Амыдта йæ Цæгат Ирыстоны сгуыхт нывгæнæг, ахуырадон уагдоны директор Хетæгкаты Аслан. Нывгæнæг-монументалист, цæстуынгæ æрмæгæй пайдагæнгæйæ, студенттæн радзырдта, Нарты кадджытæй ист фæлгонцтæ йæ куыстыты куыд равдисы, уый тыххæй. Сфæлдыстадон фембæлды бацархайдта республикæйы культурæйы министр Галазты Эдуард. Мадзал баст у Ирон «Нартиадæйы» азимæ. Хетæгкаты Аслан монументалон жанры цы куыстытæ сфæлдыста, уыдоны 'хсæн Намысы Мемориалы мозайкæ, Кировы уынджы фæлладуадзæн скверы хæдзары къулыл зæронд Дзæуджыхъæуы нывтæ, Хуссар Ирыстоны ирон драмон театры цар æмæ къултæ. Йæ ныхæстæм гæсгæ, Нарты кадджыты тыххæй зонындзинæдтæ кæстæр фæлтæры хъомылады сты ахадгæ фæрæз.