Фæллоймæ цæттæ

Сæрды скъоладзаутæн уæгъд рæстæгæй фылдæр цы вæййы. Сывæллæттæ афæдзы ацы афонæй тынгдæр ницæмæ фенхъæлмæ кæсынц. Иуæй-иутæ баулæфынмæ, иннæтæ та - бакусынмæ. Кæй фæнды, уыцы скъоладзаутæн республикæйы куыст дæттыны комитет 2 мин куысты бынатæй фылдæр сарæзта. Кæм кусдзысты æмæ сын ахæм фæллой цы пайда у, уый базондзыстут нæ дарддæры æрмæгæй. Къултæ байсæрдын, чъырæй сцæгъдын æмæ сахорын. Заводскойы 31-æм съолайы куыстытæ сæ тæмæны бацыдысты. Шпательтæ æмæ ахорæнтæ сты хæдахуыр кусджыты къухты - скъоладзауты. Цæмæй хорз у, сывæллæттæ кусæг къордты кæй фæллой кæнынц, уый зоны скъолайы директоры хæдивæг. Йæ ныхæстæм гæсгæ, сывæллæттæ кæрæдзиимæ æмæ сæ ахуыргæнджытимæ куысты руаджы æнгомдæр кæнынц, кæрæдзийы хуыздæр базонынц. Стæй ма кусæг дæсныйæдтыл дæр сахуыр вæййынц. Ирина Загагова, заводы поселоччы 31-æм скъолайы директоры хæдивæг хъомыладон куысты: «Ацы бригады хорз уымæй у, æмæ сывæллæттæ скъолайы сæхæдæг куы бакусынц, къултæ куы сахорынц, уæд сыл ныв дæр никуыуал скæндзысты. Уæдæ скъолайы хъæдæрмæгæй конд дзаумæттæм дæр сæхæдæг куы базилынц, уæд сæ сæтгæ дæр нал акæндзысты. Иннæты дæр ма нæ бауаддзысты» Профилон куыстдæттæг уагдоны куыд æмбарын кæнынц, афтæмæй фæсивæдæн æрмæст цалцæг æмæ бæстыхæйттæ саив кæныны тыххæй куыст нæ дæттынц. Ис ма сын фадат социалон æгъдауæй архайынæн дæр. Ацæргæ адæмæн æмæ Фыдыбæстæйы стыр хæсты ветерантæн æххуыс кæнын кæддæриддæр хъæуы. Æппæты вазыгджындæр та уый у, æмæ сын сæ куыстæн мызд кæй фидынц. Ацы аз уыцы хæрдзтæн радих кодтой 2 милуан соммæ бæрц. Элла Авакова, Цæгат Ирыстоны куыст дæттыны комитеты хайады сæргълæууæг: «Куыстдæтджытæ сты 30. Скъоладзаутæн ратдзысты 524 куысты бынаты. Мызды тыххæй куы дзурæм, уæд уый æнцон фарста нæу. Куыст дæттыны службæ алы мæй дæр сывæллæттæн фиды 1275 сомы». 31-æм скъолайы сывæллæттæ алы бон дыууæ сахаты æмæ `рдæг кусынц. Уый закъоны домæнтæ сты. Скъолайы ис æртæ уæладзыджы æмæ 41 агъуысты. Ахуыр та дзы кæнынц 700 сывæллонæй фылдæр. Уыдон æрвылаз сæрæн фæлæууынц æмæ се скъола сæхæдæг сцалцæг кæнынц. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv