Уæрæсейы боны агъоммæ республикæйы сæргълæууæг Сергей Меняйло паддзахадон æмæ республикон хæрзиуджытæ радта, алы къабазы чи фесгуыхт республикæйы, уыцы цæрджытæн. Регионы сæргълæууæг алкæмæн дæр загъта бузныг, бæстæйы æмæ республикæйы райрæзтмæ æвæрæн кæй хæссынц, уый фæдыл. Уæрæсейы президенты Указмæ гæсгæ æхсæнадон архайд æмæ бирæ азты æвæллайгæ куысты тыххæй «Фыдыбæстæйы раз сгуыхтдзинæдты тыххæй» цыппæрæм къæпхæны орден лæвæрд æрцыд нациты 'хсæн æхсæнадон змæлд «Наша Осетия»-йы советы сæрдар Лагкуты Владимирæн. Хæлардзинады орденæй хорзæхгонд æрцыд Цæгат Ирыстоны гуманитарон иртасӕнты институты сæйраг наукон кусæг Цыбырты Людвиг. Бæстæйы культурæ æмæ аивады райрæзтмæ стыр æвæрæн кæй бахаста, уый тыххæй «УФ-йы культурæйы сгуыхт кусæджы» ном саккаг кодтой газет «Северная Осетия»-йы сæйраг редакторы хæдивæг Александр Торинæн. Регионы сæргълæууæг ма аккаг аргъ скодта республикæйы цалдæр цæрæгæн.