Фестиваль «Фыдæлты фарн» цæуы Цæгат Ирыстоны

Цæгат Ирыстоны базарадон экономикон техникумы радон конкурс. Хъуамæ ахуыргæнæндоны студентты 'хсæн равзарой хуыздæр бæгæныфыцæджы. Кæмæн хуыздæр рауайдзæн, уый та сбæрæг кæндзысты ацы къуырийы кæрон. Райсом дзы ацæудзæн Нарты хъæзтыты æмæ национ æрмдæсныты конд дзауматы ерыстæ. Уыимæ ма майрæмбоны бацæттæ кæндзысты тематикон стъол, ирон уæлибæхты æмæ бæрæгбоны куывтыты конкурстæ дæр.  Æппæт ацы цымыдисаг ерыстæ ахуырдзауты 'хсæн цæуынц 5-æм республикон фестиваль «Фыдæлты фарн»-ы фæлгæты. Музаты Виктория ахуыр кæны нæ республикæйы базарадон-экономикон техникумы, 2-æм курсы. Ныртæккæ йæхи цæттæ кæны стыр конкурмæ. Хъуамæ сфыца бæгæны. Куыд нын радзырдта, афтæмæй йæ рагæй фæндыд йæ къухтæй конд бæгæны жюрийы уæнгтæн равдисын, цæмæй йын уыдон æмбæлгæ аргъ кæной, уый тыххæй. Дарддæр бæгæны бауадзын хъæуы 15 минуты. Кæронбæттæны та йыл ныккæнынц æнхъизæн. Уый фæстæ та йæ æрфæрсудзынц. Æрæджы техникумы байгом 5-æм республикон фестиваль «Фыдæлты фарн»-зæгъæ. Æрвылаз нысангонд цæуы Джеоргуыбайы бæрæгбонмæ. Уым æрæмбырд сты Цæгат Кавказы Федералон зылды æмæ æндæр адæмыхæттыты минæвæрттæ. Уый фæдыл ахуырдзаутæн техникумы разамынд бацæттæ кодта алыхуызон ерыстæ нæ фыдæлты æгъдæу æмæ традициты тыххæй.  Къуырийы кæрон та æвзæрст æрцæудзысты нæ республикæйы сæрæндæр æмæ бæркадджындæр Сатанатæ. Ацы конкурсмæ цæттæ у Гаглойты Ангелинæ дæр. Уый фыццаг хатт нæ архайы ацы фестивалы. Фарон дæр ын иттæг хорз бæрæггæнæнтæ сæвæрдтой ацы ерысы. Фестиваль «Фыдæлты фарн»-ы фæлгæты цы конкурстæ цæуынц, уыдон иууылдæр цæттæгонд æрцыдысты Цæгат Ирыстоны базарадон-экономикон техникумы директор Æбиты Валерийы хъæппæрисæй. Асджиагдæр ын у, цæмæй йæ ахуыргæнæндоны студенттæ хорз арæхсой нæ рагон хæринæгтæ кæнынмæ. Æмæ ма уыимæ зонгæ кæной иннæ адæмы хъæздыг историимæ дæр. Æнæхъæн къуыри цы ерыстæ цæудзысты, уыдонæн та хатдзæгтæ скæндзысты майрæмбоны. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv