Дзанайты Барис сарæзта цæрæнуатон-коммуналон хæдзарады куыстуæтты архайды фæдыл æмбырд

Цæрæнуатон-коммуналон хæдзарады къабазы куыстуæтты архайдæн хатдзæгтæ скодтой хицауады хæдзары. Æмбырд амыдта премьер Дзанайты Барис. Ныхас цыд, бынæттон æмæ республикон бюджетты хардзӕй цы организацитæ кусынц, уыдон энергон фæрæзтæй пайдагæнгæйæ цы хæстӕ скодтой, уыдон бафидыныл. Дзыртой ма бирæфатерон хæдзæртты бындурон цалцæджы регионалон программæ æмæ хъæбæр коммуналон æппӕрццæгтимæ архайды фæдыл регионалон операторты куысты хатдзæгтыл. «Газпром межрегионгаз Владикавказ»-ы генералон директор Кодзаты Алан фехъусын кодта, республикæйы бюджетон æмæ цæрæнуатон-коммуналон къабæзты абоненттæ 2023-æм азы фыццаг кварталы цы энергон фæрæзтæ схардз кодтой, уыдонæн бафысты бæрæггæнæнты тыххæй. Æдæппæтæй январæй мартъимæ фыст æрцыд сæ 86,2%. Дзæуджыхъæуы уыцы бæрæггæнæн у 99 %-æй фылдæр, фæлæ иуæй-иу районты хъуыддагыл бакусын хъæуы. Æххæстгæнæн оргæнты разамонджытæн æмæ бынæтон хиуынаффæйады уæнгтæн премьер бабар кодта, цæмæй газ æмæ электрон тыхæн бафыст уа 100%-ы. Цæрджытæ хуыздæр фидын райдыдтой бирæфатерон хæдзæртты иумæйаг исбонады бындурон цалцæгæн. 43 бирæфатерон хæдзары баивтой 44 лифты, 19 бæстыхайæн та сцалцæг кодтой сæ сæртæ æмæ инженерон хызæгтæ. Ацы аз хъуамæ базилой 36 хæдзармæ.