Горæтгæрон районы скъолатæ цæттæ сты ног ахуыры азмæ

Камбилеевкæйы 2-æм скъолайы бæстыхаймæ ног ахуыры азы размæ базылдысты. Къултæ чъырæй цагъд, пъолтæ ахуырст. Скъолайы ахуыр кæны 92 сывæллоны. Æдæппæтæй 9 къласы. Сывæллæттæн сæ зонындзинæдтæ не `вгъау кæнынц 18 ахуыргæнæджы. Скъолайы кълæстæн сæ фылдæр ифтонг у нырыккон домæнтæн дзуапп чи дæтты, ахæм кусæнгæрзтæй. Скъолайы разамонæг Хъæцмæзты Оксанæ куыд зæгъы, афтæмæй сын уæлдай æхсызгон у спортивон зал æмбæлгæ уавæры кæй ис, уый. Ацы хъуыддагмæ рагæй æнхъæлмæ кастысты.  Скъолайы ацы аз фæзындзæн уæлæмхасæн ахуырады программæ. Уымæн скъолайы хъæуы уæлæмхасæн кълæстæ рахай кæнын. Афтæ, республикæйы ахуырад æмæ наукæйы министрады уынаффæмæ гæсгæ, фыццæгæм къласы ахуырдзауты раивдзысты Камбилеевкæйы 1-æм скъоламæ. Æрмæстддæр ахæм хуызы ис уæлæмхасæн программæ æнтыстджынæй æххæст кæнын. Скъолайы бындур æвæрд æрцыд 1966 азы. Уæдæй абонмæ рауагъта бирæ зындгонд æмæ фæзминаг кæстæрты. Ахуыргæнæндон хæссы, скъолайы ахуырдзаутæй 1922 азы ‘рцыд цауты чи фæмард, уыдоны ном. Скъолайы кæртыл цæст куы ахæссай, уæд дзы иу быроны мур дæр не `ссардзына. Уый та уымæн, æмæ сыгъдæдзинадыл архайынц куыд ахуыргæнджытæ, афтæ сывæллæттæ дæр. Ай та Черменыхъæуы 2-æм скъола у. 58 азы размæ йæ сарæзтой. Уалдзæджы бæстыхайы сæр дымгæ ахаста. Уымæ гæсгæ йæ ногæй раивтой. Ацы скъолайы ахуыр кæны 240 скъоладзауы. Зонд сын амонынц 29 ахуыргæнæджы. Ныртæккæ сæхи бæстонæй цæттæ кæнынц ног ахуыры азмæ æмæ зилынц ахуыргæнæн уæттæм.Ныридæгæн кълæстæ ифтонг сты интерактивон фæйнæджытæй æмæ æндæр хъæугæ кусæнгæрзтæй. Скъоладзаутæ ма ахуырæй уæлдай сæ арæхстдзинад æвдисынц алыхуызон секциты. Сабитæ зæрдæргъæвдæй архайынц кафджыты къорды. Скъолайы спортивон зал   программæмæ гæсгæ бындуронæй сцалцæг кæндзысты 2020 азы. Сифтонг æй кæндзысты нырыккон домæнтæн дзуапп чи дæтты, ахæм гæрзтæй. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv