Æфсæддон уасхæссæгимæ аныхас кæнын æмæ экстремалон уавæрты куысты тыххæй базонын куыд хъуамæ ма уа цымыдисаг журналисттæн? Ахæм фадат фæзынд æппæтадæмон медиафорум «PRO Кавказы»-ы архайджытæн. Абон кусы дыккаг бон. Цымыдисаг программæйы ис тематикон лекцитæ, дæсныйадæвдисæн ахуыртæ æмæ федералон спикертимæ фембæлдтытæ. Форумы дыккаг боны программæ у цымыдисаг æмæ хъæздыг: тематикон лекцитæ, федералон спикертимæ комкоммӕ ныхас. Уæлдай æргом здахынц социалон хызæгты темæмæ. Адæмы раз рæсугъд æмæ æнтыстджынæй раныхас кæныныл ахуыр кодта дæсныйадæвдисæн ахуыры информацион агентад ТАСС-ы пресс-центры разамонæг Николай Яковлев. «Вконтакте»-йы регионалон проектты разамонæг Татьяна Маркина та радзырдта, сæ мессенджер абон куыд кусы, стæй нæхи бæстæйаг медиапродукт куыд парахат кæнын хъæуы, уый тыххæй. Аразгæ интеллектæн йæ бон суыдзæн раззагдæр регионалон каналты журналистты баивын, æви нæ, ууыл та бæстонæй дзырдта Стъараполы телеканал «Своё ТВ»-йы генералон директор Алексей Папченя. Уыдон æппæты фыццаг скодтой нейрохызæгæй арæзт боныхъæды равдыст. Уæрæсейаг журналист, телеканал «Санкт-Петербург»-ы сæйраг директор Александр Малькевич æмæ батальонтæ «Шторм.Осетия» æмæ «Алания»-йы сæрмагонд уацхæссæг Мамсыраты Георгий дæр ныхас кодтой медиаæхсæнады минæвæрттимæ. Спикертæ радзырдтой, сæрмагонд æфсæддон операцийы раззагдæр бынæтты информацион хæст куыд цæуы, уый тыххæй. Форумы фæлгæты ма арæзт цæуы журналисты дæсныйады æркаст «Идея PRO». Ис дзы 8 номинацийы. Сæрмагондæй дзы фæхицæн кодтой иу номинаци: «Фыдыбæстæ хъахъхъæнджыты тыххæй æрхъуыды: знон, абон, кæддæриддæр!» Æркасты хуыздæр куыстæн ратдзысты гран-при. Биджелты Бертæ