Уæрæсейы гварди бабæрæг кодта Фыдыбæстæйы Стыр хæсты ветеран Иван Селезневы.

Цæгат Ирыстоны Уæрæсейы гвардийы управленийы разамонæг пъæлицæйы булкъон Рæмонты Эльбрус Уæлахизы боны агъоммæ бабæрæг кодта Фыдыбæстæйы Стыр хæсты ветеран Иван Селезневы. Балæвар ын кодта дидинджытæ æмæ зынаргъ лæвæрттæ. Уазджытыл ветеран зæрдиагæй бацин кодта. Сæ æрхъуыдыйæн сын загъта бузныджы ныхæстæ. Иван Селезнев радзырдта йæ саби бонты тыххæй. Æрымысыд йæ службæгæнæн рæстæг. Хæсты тыххæй цаутæн ветеран радих кодта уæлдай рæстæг. Зæрдæ рисгæйæ сын радзырдта тугкалгæ хæсты тыххæй. Уыцы заман йæ æмгæрттимæ цы тухитæ æвзæрстой уыцы царды тыххæй дæр нæ басусæг кодта. Хæсты архайæгыл нæуæдз фараст азы цæуы. Фæлæ нырма у сæрæн. Хæст у иу хъуыдыйыл - фæсивæды хъомыл кæнын хъæуы хъабатрыдзинады æмæ райгуырæн зæххы уарзондзинадыл. Йæ хæсыл нымайы сæ фыдыбæстæйы сæраппонд йæ цард чи радта уыцы хъæбатырты нæмттæ цæмæй рох ма фæуой. Цæгат Ирыстоны Уæрæсейы гвардийы управленийы разамонæг Рæмонты Эльбрус стыр арфæ ракодта Иван Селезневæн. Куыд фæнысан кодта, афтæмæй æрмæст уыцы рæстæджы æвзонг лæппуты хъæбатырдзинады руаджы мах цæрæм сабыр дуджы. Бафтаудзыстæм ма уый æмæ Иван Селезнев хорзæхджынгонд у "Сырх стъалыйы" æмæ Фыдыбæстæйы стыр хæсты 1-аг къæпхæны ордентæй æмæ æндæр майдантæй. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv