Республикон æркаст «Иры фидæн»

Сывæллæтты ирон адæмы æгъдау, нæ мадæлон æвзаг æмæ культурæмæ æмхиц кæнын, се сфæлдыстадон миниуджытæ рæзын кæнын æмæ сын сæ курдиат раргом кæнын. Ацы хæсимæ арæзт æрцыд республикон æркаст «Иры фидæн», зæгъгæ. Бацархайдтой дзы скъолайы агъоммæ ахуыргæнæндæтты хъомылгæнинæгтæ. Ирон æвзагыл æмдзæвгæтæ, аргъæуттæ, инсценировкæтæ æмæ уацмыстæй скъуыддзæгтæм байхъуыста нæ уацхæссæг Хуасдзауты Алинæ. Йæ æрмæг цæттæ у равдисынмæ. Табуафси, бакæсут æм. Афтæ нæ республикæйы рæвдауæндæтты хъомылгæнинæгтæ равдыстой сæ арæхстдзинад æмдзæвгæтæ аив дзурынæй сывæллæтты сфæлдыстады хæдзары сценæйыл. Сыгъдæг ирон æвзагыл дзырдтой нæ республикæйы номдзыддæр авторты æмдзæвгæтæ. Ацы æркасты сабитæй бирæтæ фыццаг хатт нæ архайынц. Æркастмæ бацæттæ кодтой аргъæуттæ, инсценировкæтæ æмæ уацмыстæй скъуыддзæгтæ. Кæд нырма гыццыл сты, уæддæр сценæйыл сарæзтой цымыдисаг сурæттæ. Сабитæн сæхи зæрдæмæ дæр тынг фæцыд сæ дæсныдзинад. Сывæллæтты æркастмæ бацæттæ кодтой сæ хъомылгæнинæгтæ. Сæ ныхæстæм гæсгæ сабитæ тынг зæрдæргъæвдæй архайдтой, цæмæй конкурсы сæхи æнтыстджынæй равдисой. Сывæллæтты арæхстдзинадæн аргъ кодтой жюрийы уæнгтæ. Се `хсæн – нæ республикæйы ахуыргæнджыты дæсныйад уæлдæргæнæн институты специалисттæ æмæ ирон æвзаджы ахуыргæнджытæ. Æркасты архайджытæ сæхи куыд бæстонæй бацæттæ кодтой, уымæй быззадысты тынг разыйæ. Æркаст у æрвылазон. Арæзт у дыууæ къæпхæнæй. Фыццаг цыдис Æрыдоны. Йæ сæйраг нысан у сывæллæтты сæ мадæлон æвзагмæ æмхицдæр кæнын, Хъуамæ сын сæ сабийы бонтæй фæстæмæ мадау адджын уа. Уæдæ ма æркасты се сфæлдыстадон курдиæттæ дæр раргом вæййынц. Жюрийы уæнгтæ хуыздæрты сбæрæг кодтой. Уæлахиздзауты та схорзæхджын кæндзысты 15-æм майы ирон æвзаджы бæрæгбоны. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv