Цæгат Ирыстоны схорзæзджын кодтой конкурстæ «Иры фидæн»-ы æмæ «Аив дзырды дӕсны»-йы уæлахиздзауты

Цæгат Ирыстоны кадджын уавæры схорзæзджын кодтой конкурстæ «Иры фидæн»-ы æмæ «Аив дзырды дӕсны»-йы уæлахиздзауты. Хуыздæр скъоладзаутæ æмæ рæвдауæндæтты хъомылгæнинæгтӕ, стæй техникумты æмæ колледжты студенттæ кады гæхæттытæ райстой ахуырад æмæ наукæйы министр Алыбегты Эллæйы къухӕй. Сæ курдиат лæппутæ æмæ чызджытæ æвдыстой алыхуызон номинациты. Дыууæ ерысы дæр арæзт уыдысты Хетæгкаты Къостайы райгуырды 162 азы бонмæ. Хетæгкаты Къостайы райгуырды бонмæ ацы сабитæ сæхи цæттæ кæнын райдыдтой рагацау. Дызæрдыккаг нæу, алкæй дæр сæ кӕй фӕнды куыдхуыздæрӕй равдисын адæмон поэтмæ йæ уарзондзинад. Алы аз дӕр ацы бæрæгбоны кадæн республикæйы ахуырад æмæ наукæйы министрад расиды алыхуызон æркастытæ. Сæ иу «Иры фидæн». Ирыстоны аив дзырды чысыл дæснытæ сæ арæхстдзинад равдисынц куыд æмдзæвгæтæ кæсынæй, афтæ алыхуызон равдыстыты дæр. Сывæллоны йæ сабибонтæй фæстæмæ мадæлон æвзагыл æнувыд кæнын. Ацы хæс рæвдауæндæтты хъомылгæнинæгтæ нымайынц сæйрагдæрыл. Разæнгардæй архайынц æркастыты. Конкурсы сæйраг нысан у - сывæллæтты зæрдæты гуырын кæнын уарзондзинад мадæлон æвзагмæ. Æркасты архайджыты бæрц ацы аз дыууæ хатты фæфылдæр. Бацархайдтой дзы скъоладзаутæ дæр. Домæнтæ фæкарздæр сты. Республикæйы ахуырад æмæ наукæйы министр Алыбегты Эллæ схорзæхджын кодта æркастыты уæлахиздзаутæ æмæ призерты. Æркаст «Иры фидæн»-ы хатдзæгтæм гæсгæ кады гæххæтытæ æмæ зæрдылдарæн лæвæрдтæ райстой 19 адæймаджы. 39-æй та — æркаст «Аив дзыры дæсны»-йы. Мадзал аразджытæм фæзынд фидæнмæ хъуыдытæ дæр. Фæнды сæ ацы конкурсы формат телеуынынады тыгъдадмæ рахæссын, цæмæй сабиты арæхстдзинæдӕн æвдисæн, канд жюрийы уæнгтæ ма уой, фæлæ æгас дзыллæ дæр. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv