Нæ республикæйы сæргълæууæг бабæрæг кодта рынчындон

Битарты Вячеслав æмæ Михаил Ратманов бабæрæг кодтой тагъд æххуысы клиникон рынчындон. Куыд раиртæстой, афтæмæй пациенттæ ницы цух сты, дохтыртæ æмæ медицинон хотæ сæ мызд исынц афоныл, рынчындон ифтонг у хъæугæ кусæнгæрзтæй. Республикæйы сæргълæууæг æрзылд палатæтыл, аныхас кодта рынчынтимæ, фарста сæ, медицинон лæггæдтæй разы сты æви нæ, стæй цы хъуаг æййафынц, зæгъгæ. Разыйæ баззад, йæ хæслæвæрдтæ йын кæй сæххæст кодтой, уымæй. Афæдзы размæ Битарты Вячеслав уыд рынчындоны æмæ йæ цы уавæры баййæфта, уымæй адæймаджы зæрдæ мæгуыр кодта. Пациенттæ хъаст кодтой, алцы дæр, суанг бæмбæджы онг, сæхæдæг кæй æлхæдтой. Цыбыр рæстæгмæ уавæр цæхгæр хуыздæрырдæм аивта. Реанимацион, травматологон хайæдтæ ницы хъуаг сты, суанг ма сæм мобилон УЗИ-аппарат фæзынд хуысгæ рынчынтæн æххуысæн. Рынчындоны ма райдыдтой сины æрхæджытыл операцитæ кæнын æмæ протезтæ æвæрын. Раздæр-иу уыйтыххæй адæмы хъуыд федералон медицинон центртæм цæуын. Кæд афæдзмæ бирæ хорз ивддзинæдтæ æрцыд, уæддæр ма бакусинаг фарстатæ бирæ сты. Зæрдæмæдзæугæ нæу гастроэнтерологон хайад. Бырдурон цалцæггæнинаг рагæй у: палатæтæ сты уымæл, цартыл хъуына фæхæцыд æмæ къултæ кæлынц. Ацы сæрды бæстыхайы сæр баивтой. "иннæ аз ацы фарста хъуамæ лыггонд æрцæуа", - загъта республикæйы сæргълæууæг. Кæлæддзаг уавæры уыд гинекологон хайад дæр. Фарон йæ кусæг балцы рæстæг Битарты Вячеслав бахæс кодта пациенттæн æмбæлгæ уавæртæ саразын æмæ хайад раивтой ног бæстыхаймæ. Рынчындон ма цух у томографион аппараттæй. Чи сыл куса, уый нæй. Республикæйы сæргълæууæг дзырд радта, æрыгон специалистты регионы бюджеты хардзæй ахуыр кæнынмæ кæй æрвитдзысты. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv