Ирон режиссерты кинонывтæ равдисдзысты æппæтадæмон фестивалы

Ирон режиссерты кинонывтæ равдисдзысты æппæтадæмон фестивалы. 24-æмæй 27-æм августмæ Уфайы арæзт цæудзæн 4-æм æппæтадæмон кинофестиваль «Серебряный Акбузат», зæгъгæ. Нæ республикæ дзы равдисдзæн Чъерджиаты Индирæйы документалон киноныв «Хочу быть президентом», стæй Цæлыгкаты Вадимы киноныв «Алибек». Хетæгкаты Къостайы номыл премийы лауреат, зындгонд режиссер Гулуты Вячеслав та у документалон киноныв «Хочу быть президентом»-ы продюсер. Йæ ныхæстæм гæсгæ, кинонывы æвдыст цæуы, йе ‘нæниздзинад хъыгдард кæмæн у, ахæм гыццыл чызг йæ алфамблайы дуне куыд аивынмæ хъавы, уый. Дзебысаты Орнеллæ у кинонывы сæйраг архайæг. Чызджы сурæт æвдисгæйæ, киноаразджытæ дзурынц, се 'нæниздзинад хъыгдард кæмæн у, уыдоны удварн æмæ цардуарзондзинады тыххæй. Киноныв «Алибек» та ист у, бæхылбадджыты къорд «Джигиты Али-бек»-ы бындурæвæрæг æмæ разамонæг Хъантемыраты Алибек манежмæ куы рахызт, уæдæй 110 азы сæххæсты фæдыл. Йæ режиссер Цæлыккаты Вадимы ныхæстæм гæсгæ, ахæм киноныв саразыны хъуыды разынд Алибекы фырт Ирбекмæ суанг 1998-æм азы. Фæлæ уыцы рæстæг уыййас фæрæзтæ нæ разынд. Ныр Уæрæсейы культурæйы министрады æххуысæй ацы сфæлдыстадон хъуыды сæххæст кæнын бантыст. Уæ зæрдыл уын æрлæууын кæндзыстæм, фестиваль «Серебряный Акбузат» фæзынд 2014-æм азы. Рауад дзы æрмæст нæ бæстæйæн нæ, фæлæ ма бирæ æндæр бæстæтæн дæр национ кинонывты сæйрагдæр фæз. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv