Аст мыггаджы хистæртæ сæ къухфыстытæй бафидар кодтой «Фæдзæхст ирон кады номыл». Чиныджы сæйраг нысан - ирон адæмы нæртон æгъдау фæцудын ма бауадзын. Æмæ уый тыххæй фылдæр хъарутæ раттын мыггæгты 'хсӕн бастдзинæдтæ сфидар кæнынæн. Сæ ахадындзинад рапарахат кæнын æхсæнадон царды. Фæдзæхсты фыст ис, алы мыггаджы дæр хистæр кæй ис. Иунæгæй йын архайæн нæй - йæ фарсмæ æрбалæууæнт мыггаджы куырыхон лæгтæ, мыггаджы Ныхас. Не 'хсæнадон бындур фидар кæныны хæстæ та, æгъдауыл æнцойгæнгæйæ, мыггæгты æхсæн сæхимæ райсæнт дзырддзæугæдæр лæгтæ. Кæстæртæ хъуамæ сæ мыггаджы равзæрд, æрвадæлты æмæ къабæзты зоной. Бинонты 'хсæн хъæуы ирон æвзагыл дзурын, кæсын Нарты кадджытæ, ирон чиныг, газет æмæ журнал, ахуыр кæнын ирон зарæг, кафт, цагъд. Ныййарджытæн цотимæ хъуамæ дзурой мадæлон æвзагыл. Фæлæ уыцы иу рæстæг ахуыр кæнын хъæуы уырыссаг æмæ фæсарæйнаг æвзæгтæ дæр. Хъуамæ нæ хъуыдытæ, нæ ныхас, нæ хъуыддаг уой иу, кæрæдзийæ хицæн ма кæной. Фарон «Фæдзæхст ирон кады номыл» сæ къухфыстытæй бафидар кодтой 60 мыггаджы хистæры. Чиныг у нывджын, ис дзы Ирыстоны хъæуты гербтæ дæр. Уæвгæ, «Иры Стыр Ныхасы» егъау куыст цæуы, цæмæй алы мыггаджы дæр хистæрты Совет уа. Сæрмагонд комитетæн разамынд дæтты Æгкацаты Юрий. Абон «Фæдзæхст» радтой Цæгат Ирыстоны Национ музеймæ. Кадджын уавæры лæвæрд æрцыд йæ разамонæг Цуциты Асланмæ. Ныр музейы уазджытæн амондзысты, чиныгæн цы мидис ис, уый. Ахсджиаг гæххæтт саразыны хъæппæрис, фыццаджыдæр, разынд Стыр Ныхасы мæздæггаг хайады сæрдар Гуцаты Фридонмæ.