Дзæуджыхъæуы аивæдты училищæйы ацыд Нарты кадджытимæ баст хуыздæр плакатты æркаст

Дзæуджыхъæуы аивæдты училищæйы абон æвзæрстой, Нарты кадджыты тыххæй хуыздæр плакат чи скодта, уыдоны. Æркаст цæуы Нартиадæйы азы фæлгæты. Йæ аразджытæ сты Цæгат Ирыстоны культурæйы министрад æмæ республикон аивæдты училищæ. Архайдтой дзы ахуыргæнæндоны 1-3 курсыты студенттæ. Æдæппæтæй æрыгон нывгæнджытæ бацæттæ кодтой 34 куысты. Арæзт сты алыхуызон техникæтæм гæсгæ. Плакаттæн аргъ скодта фæлтæрдджын жюри. Се 'хсæн училищæйы ахуыргæнджытæ æмæ дзуапдæттæг министрады минæвæрттæ. Равзæрстой æртæ уæлахиздзауы. Уыдоны ног къуыри кадджын уавæры схорзæхджын кæндзысты Кады гæххæттытæ æмæ арфæйы фыстæджытæй. Хуыздæр куыстытæ та баннерты хуызы сфидар кæнынмæ хъавынц нæ горæты æмæ районты уынгты. Уæ зæрдыл уын æрлæууын кæндзыстæм, Цæгат Ирыстоны сæргълæууæджы указмæ гæсгæ 2023-æм аз у ирон Нартиадæйы азыл нымад. Афæдзы дæргъы нæ республикæйы арæзт цæудзысты Нарты кадджытимæ баст алыхуызон культурон мадзæлттæ. Уыцы хъæппæрис фыццаг разынд Цæгат Ирыстоны культурæйы министры хæдивæг Хъуыссæты Зæлинæмæ. Йæ ныхæстæм гæсгæ, æркасты сæйраг нысан у фæсивæды ирон культурæйы хæзнатимæ зонгæ кæнын.