Цы хуыздæр - сабитæн

Тагъд рæстæджы Беслæны ныййарджытæ сулæфдзысты. Рæвдауæндонмæ сæ сæ сывæллæты бакæнынмæ рады лæууын нал хъæудзæн. Сарæзтой дзы дыууæ ног рæвдауæндоны. Иу дзы рæхджы байгом кæндзысты, иннæ та ныридæгæн кусын райдыдта. Ис Менделеевы номыл уынджы. Ивгъуыд къуыри йæ кадджын уавæры байгом кодта Битарты Вячеслав. Куыд кусы сывæллæтты ног рæвдауæндон æмæ дзы цы уавæртæ ис, уый та базондзыстут нæ дарддæры æрмæгæй. Цалдæр къуырийы размæ дæр ма ацы бацæуæнтæ уыдысты афтид. Ныртæккæ дзы хъуысы сывæллæты худт. Ивгъуыд къуырийы Беслæны кадджын уавæры байгом сывæллæтты рæвдауæндон. Кадджын мадзалы республикæйы сæргълæууæг Битарты Вячеслав куыд бафиппайдта, афтæмæй æппæты вазыгджындæр хæс у сывæллæтты рæвдауæндæтты фаг бынæттæ скæнын. Ног рæвдауæндоны ис 120 бынаты. Ныридæгæн дзы хъомыл кæнынц 70 сывæллоны. Иннæтæн дæр сæ гæххæттытæ фæцæттæ кæнынц. Рæвдауæндоны хъомылгæнинæгтæн ис æппæт хъæугæ фадæттæ. Уавæртæм æцæгæйдæр фау æрхæссын зын у. Ис дзы æппæт хъæугæ ног кусæнгæрзтæ, кæрты спортивон фæз, уымæй уæлдай зал мидæгæй. Уæдæ музыкалон кълас, медицинон пункт æмæ процедурæтæ кæнæн уат саразын дæр сæ нæ ферох. Дзаумæттæ кæм æхсой, уый дæр сын ис. Домæнтæм гæсгæ дзы хуыссæны цъæрттæ ивынц къуыри иу хатт. Программæ «æнцонвадат цардыуаджы» фæлгæты та дзы иу уат сæрмагондæй сарæзтой, йе `нæниздзинад хъыгдард кæмæн у, ахæм сывæллæттæн. Рæвдауæндоны æнæхъæн суткæ кусы видеоцæстдарды системæ, ис дзы домофон. Уымæй уæлдай ма сывæллæтты алы уатæй дæр ис уæлæмхасæн рахизæн. Уагдоны кусджытæ уæлдай цин кæнынц сæ ног хæрæндоныл. Рахизфарсы районы администрацийы ахуырад, физкультурæ æмæ спорты фарстаты фæдыл управленийы скъолайы агъоммæ ахуырады хайады сæргълæууæг Ирина Каниди: «Фæнды мæ уæлдай хатт нырыккон хæрæндоны кой скæнын. Ис дзы хибар цехтæ: дзидза æмæ кæсагæн, халсартæ æмæ уазал продукцийæн. Тæвд хæринаг кæнæн цехы ис ног нырыккон кусæнгæрзтæ. Сты фæстауæрцгæнæн технологитимæ арæзт. Ныр хæринаггæнджыты алывæрсыг хæрдзтæ уыдзысты зынгæ къаддæр». Уæлдай цæстæй æркастысты рæвдауæндоны æддаг аивдзинадмæ. Специалистты ныхæстæм гæсгæ, сывæллæтты психикæйыл рæсугъддзинад хæрзмæ ахады. Зæгъæм, æрмæст сæ хъазæн фæзтæй – уыдон та сты 6 – зæрдæ райы. Ныртæккæ сывæллæттæ ахуыр кæнынц сæ ног рæвдауæндоныл, ног уæттæ æмæ ног хъомылгæнджытыл. Уæдæ сæ ныййарджытæ дæр афтæ. Ацы къуыри рæвдауæндонмæ цæуын райдайдзысты, кæмæн æй сарæзтой, уыцы 120 сывæллоны дæр. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv