Суворовы номыл училищæйы курсанттæ уыдысты Нары

Суворовы номыл æфсæддон училищæйы курсанттæн сарæзтой экскурси Нармæ. 11 курсанты базонгæ сты ирон литературон æвзаджы бындурæвæрæг Хетæгкаты Къостайы цардимæ. Музейы федтой бирæ экспонаттæ, сæ зæрдæмæ фæцыдысты. Къостайы мемориалон хæдзар арæзт æрцыд 1979-æм азы. Сарæзтой йын æй йæ райгуырæн къонайы. Равæрдтой дзы `нудæсæм æнусы конд зæронд дзауматæ. Суанг ма дзы рагон тынуафæн дæр ис фенæн. Æмбырд та сæ кодтой æгас комы цæрджытæ æмæ музейы кусджытæ. Суворовы номыл училищæйы курсантты балц æмæ Къостайы хæдзар-музей фенынмæ мах дæр араст стæм Уæлладжыры коммæ. Хетæгкъаты Къостайы райгуырæн бынат хи цæстæй фенын æмæ, литературон æвзагæн бындур чи сæвæрдта, уый царды фæзилæнтæ хуыздæр базонын. Суворовы номыл училищæйы курсанттæй бирæтæ Къостайы мемориалон хæдзары сты фыццаг хатт. Сæ зæрдæмæ хæстæг айстой цымыдисаг цаутæ поэты цардæй. Къостайы сфæлдыстадимæ баст фÆрстытæн дзуапп лæвæрдтой музейы кусджытæ. Нарыхъæуы Къоста царди, цалынмæ йыл 8 азы нæ сæххæст, уæдмæ. Уæды рæстæгæй дзы бирæ цыдæртæ баззад æнæивгæйæ. Хетæгкаты Къостайы хæдзар-музейы ис 3 уæладзыджы. Ис дзы рагон ирон кусæнгæрзтæ. Дыккаг уæладзыг у ирон хæдзар. Агъуыст дих у нæлгоймæгты æмæ сылгоймæгты хæйттыл, астæуæй та - Сафайы рæхыс. Поэт, прозаик, драматург, нывгæнæг, æхсæнадон архайæг Хетæгкаты Къостайыл райгуырдыл ацы аз æххæст кæны 160 азы. Уыцы бон Цæгат Ирыстоны бæрæг кæндзысты уæлдай уæрæхдæр. Фæсивæдæн ацы акци «Цæуæм музеймæ» сарæзтой программæ «С чего начинается Родина», зæгъгæ, уый фæлгæты. Бакуыстой йыл Æппæтуæрæсеон адæмон фронты уæнгтæ. Цæуынц хъæутæм æмæ иртасынц, кæм цы зындгонд адæм цард, уыдоны истори. Зонын сæ кæнынц фæсивæдæн. Уыцы адæмы æмæ, историон нысаниуæг кæмæн ис, ахæм цауты фæрцы горæттæ æмæ хъæутæн сæ кадыл æфтауынц. Уый сæм адæмы дæр ноджы тынгдæр æлвасы. Уæрæхдæр хъуыдыгæнгæйæ, уый сахаддзæн туризмыл дæр. Проект дарддæр дæр æххæст кæндзысты. Æппæтуæрæсеон адæмон фронты уæнгтæ фæсивæдимæ Нарæй уæлдай бабæрæг кодтой æндæр горæттæ æмæ хъæутæ дæр. Уæвгæ сæ балцæн канд феныны нысан нæ уыд. Йæ хъомыс - экологон акцитæ. Кæм хъуыд, уым-иу сæ сарæзтой æмæ-иу алфамблайтæ бафснайдтой. Сывæллæттæ фæбузныг сты сæ разамонджытæй, ахæм æвæджиауы балц сын кæй балæвар кодтой æмæ ног хабæрттæ кæй базыдтой, уый тыххæй. Æрдзы хъæбысмæ экскурси сæ зæрдæты ныууагъта ирд фæд. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv