Сидзæр сывæллæттæ æмæ хи бинонтæй цавæрдæр аххосæгты тыххæй чи фæиппæрд, уыдонæй 2023-æм азы цæрæнбынæттæй сифтонг кæныны фарстатыл ныхас цыд ведомствоты 'хсæн къамисы æмбырды. Амыдта йæ республикæйы хицауады сæрдары хæдивæг Тугъанты Ларисæ. Фæллой æмæ социалон хъахъхъæнынады министр Айдарты Алинæ радзырдта, ацы фарстайы фæдыл цы куыст цæуы, уый тыххæй. Йæ ныхæстæм гæсгæ, æрыгон адæмæн домæнтæм гæсгæ агуырд цæуы цæрæнбынæттæ Дзæуджыхъæуы æмæ республикæйы районты. Контрактты кæцыдæр хай ныридæгæн бафыстой. Фатертæ кæмæн æмбæлы, уыдонæн сæ ратдзысты афæдзы кæронмæ. Тугъанты Ларисæ куыд фæнысан кодта, афтæмæй сидзæртæн хæдзæрттæ дæттыны хъуыддагмæ хъуамæ уа уæлдай бæстон æркаст. Цæрæнбынæттæ хъуамæ дзуапп дæттой домæнтæн. Бæрнон кусджытæн бабар кодта кусæг къордтæ снысан кæнын, цæмæй районты æмæ Дзæуджыхъæуы бынатмæ цæуой æмæ аргъ скæной фатертæн.