Уæрæсейы субъекттæ хъуамæ биноныгæй æркæсой æнæмæнг QR кодты закъоныпроектмæ
Базарадон центртæм, æхсæнадон хæрæндæттæм Цæгат Ирыстоны ныр æнæ QR-кодтæй бацæуæн нæй. Куыд кусы ног системæ Дзæуджыхъæуы, уый сбæлвырд кодтой Уæрæсейы фæлхасгæнджытæм цæстдарды управленийы специалисттæ æмæ мидхъуыддæгты министрады минæвæрттæ. Семæ абалц кодта не сфæлдыстадон къорд дæр. Рейд Дзæуджыхъæуы егъау базарадон центртæй иуы. Хъахъхъæнæн системæйы куыстмӕ фиппаинӕгтӕ нӕ разынд. Уӕдӕ дуканимӕ цӕуджытӕ дӕр афтӕ. Ӕрмӕстӕр сæрмагонд QR-код равдисгӕйӕ ис бацӕуӕн æмæ хъæугæ товартæ балхæнӕн.Уæйгæнджытæм дæр ис домæнтæ: æнæ хихъахъхъæнæн фæрæзтæй сын кусæн нæй. Фæлæ уый бирæ уæйгæнджытæ, хъыгагӕн, нæ зонынц кæнæ та сæм куыдфæндыйы цæстæй кæсынц. Маскæтæ скодтой, æрмæстдæр Уæрæсейы фæлхасгæнджытæм цæстдарды управленийы минæвæртты куы ауыдтой, уæд. Фæстиуджытӕ бæлвырд сты: ӕппынкъаддӕр - бон ӕрцӕудзӕн сӕфт, гӕнӕн ис, ӕмӕ ма административон æгъдауæй иваримӕ. Иннӕ базарадон бынаты фондз хЬахЬхЬӕнӕгӕй ӕрмӕстдӕр иу бацагуры QR-кодтӕ, ӕмӕ ӕнӕ уыдонӕй мидӕмӕ нӕ уадзы. Ӕрмӕстӕр дзы иумӕ разынд ӕмбӕлгӕ кӕд, иннӕтӕ фӕстӕмӕ здӕхтысты. Фылдæр хатт уайдзæф æрхауы, афтæ чи фæхъуыды кæны æмæ зæрдæ чи фæдары, йæ QR-код дæр ын кæй не сбæрæг кæндзысты æмæ дзы паспорт дæр кæй нæ бацагурдзысты, уыдонмӕ. Цæгат Ирыстоны æнæ QR-кодӕй нæй бацæуæн æхсæнадон хæрæндæттæм дæр. Кæд æвдисæндармæ фау æрхæссæн нæй, уæд дæ бон у бацæуын. Ам ацы хъуыддагмæ бæрнон цæстæй кæсынц. Дзырдæн зæгъæм, ардæм фыццӕгты бӕрӕггӕнджыты сӕхи дæр нæ уагътой. Дарддæр бацыдыстӕм иннæ уагдонмæ. Алцыдæр, куыд æмбæлы, афтæ. Пæлицæйаджы бон у æвдисæндармæ ногæй æркæсынмӕ бацæуын хæрæндоны уазджытæй кæмæфæндыдæр. Уый уагхæлд нæу. Ӕмӕ йӕ ӕмбарын хъӕуы, нæ республикæйы уавæр нырма сæ хæрзтæй кӕй нæу, уый тыххӕй ӕххӕстгонд цӕуынц ахӕм мадзӕлттӕ. Иумæйаг иммунитет нырма не сфидар. Уæрæсейы регионтæн сæ фылдæр сты, «цъæх паспорттæ» кæй хонынц, уыдонимæ. Уым уавæр æвзæр кæй у, уымæ гæсгæ цæстдард фӕкарздæр кодтой. Цæгат Ирыстоны Сергей Меняйлойы уынаффæмæ гæсгæ QR-код хъæуы, адæм бирæгæйттæй кæм æмбырд кæнынц, уым. Ома æхсæнадон хæрæндæтты, бассейнты, фитнес-центры, театрты, кинотеатрты æ.а.д. QR-код системæ ног закъоны хуызы Паддзахадон Думæ ныридæгæн арвыста регионтæм. Рæстæг - дыууæ мæйы. Фыццæгæм февралæй фæстæмæ Уæрæсейы цæрджыты цард аивдзæн,цæрдзысты ног домæнтæм гæсгæ. Абон Æнæниздзинад хъахъхъæнынады министрад адæмы размæ рахаста ковиды ныхмæ вакцинацийы сертификатты медицинон документациимæ куысты ног фæтк. Ныр прививкӕйы фӕстӕ чи фӕрынчын коронавирусæй, уыдоны QR-кодтæ æцæгыл нымад нал цӕудзысты. Уый ныхмæ йын ратдзысты ног, рынчын кæй уыд, уый нысангонд кæм ис, ахæм. Æвдисæндартæ цы рæстæгмæ лæвæрд сты, уый ивд не`рцыд-нымæцон пропускæй прививкæйы фæстæ пайда кæнæн ис афæдз дæргъы, низы фæстæ та - 6 мæйы. Вакцинацийы справкæ райсæн ис Бирæвæрсыг центры, кæнæ та рынчындоны. Ахæм фадатæй спайда кæнæн ис низы фæстæ дæр. Документ электрон хуызы ис паддзахадон лæггæдты порталы дæр. Æнæ «цъæх паспортæй» бацӕуæн ис афтектæм æмæ фæлхасадон дуканитæм, уыдоны хыгъды ма пайда кæнæн ис æхсæнадон транспортæй. Фæлæ QR-код равдисын кæм хъæуы, уырдæм бахауыны тыххæй та бар-ӕнæбары вакцинаци скæндзынæ. Ам æххæстгонд цæуы хуымæтæг фæтк - вакцинаци кæнын дæ кæд нæ фынды, уæд æртæ бонæй æртæ бонмæ ис ПЦР-тест. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv