Райсом Ирыстон фæстаг фæндараст зæгъдзæн Андиаты Сосланæн

Олимпаг хъæзтыты дыууæ хатты чемпионы зæрдæ йæ куыстæй ныллæууыд Мæскуыйы клиникæйы. Цыдис ыл 66 азы. Нæ номдзыд æмзæххонæн фæстаг хæрзбон зæгъæн уыдзæн Ирон театры фæзы 11 сахатыл. Ныгæд та æрцæудзæн Джызæлы уæлмæрды, йæ ныййарджытæ кæм ныгæд сты, уым. Сосланæн афтæ йæхи бафæндыд. Ирон спорты ирд стъалыйыл - нæ дарддæры номарæн æрмæг. Йæхицæй хуыздæр æмæ уæздандæр адæймагæн скæнæн нæ уыд. Фæсивæдæн уыд фæзминаг. Олимпаг хъæзтыты 2 хатты чемпион райгуырд 1952 азы 21 апрелы Дзæуджыхъæуы. Сослан бинонты `хсæн уыд се `ппæты кæстæр. Йе `мбæлттæ æмæ йæ хæстæджытæ куыд дзурынц, афтæмæй йæ сабибонтæй фæстæмæ уыд хъæддых æмæ йын богал æнæсуæвгæ нæ уыд. Йæ фыд Петр йæхи фæлвæрдта уæзæгтæ исыны спортæй. Йæ хистæр æфсымæртæ та Геннадий æмæ Сергей уыдысты хъæбысæйхæцджытæ. Цалдæр хатты систы Уæрæсейы уæлахиздзаутæ. Сосланыл 12 азы куы цыд, уæд æй йæ хистæр æфсымæртæ æрбакодтой залмæ, уæгъдибар хъæбысхæсты скъолайы бындурæвæрæг Дзгойты Аслæнбегмæ. 5 азы фæстæ æрыгон спортсмен Америкæйы сси дунеон чемпион. Йæ хистæр æфсымæр Сосланы спортивон фæндагæн стыр ахъаз фæцис. Ацы къам систой 1971 азы уæгъдибарæй хъæбысхæсты ерысты. Пъедестал Андиаты Сослан æмæ йе `фсымæртæ сæхи бакодтой. Уыцы ерысты рамбылдтой æппæт майдантæ дæр. 1976 азы Сослан фæуæлахиз олимпаг хъæзтыты Монреалы. Андиайы-фырт сси Цæгат Ирыстоны фыццаг олимпаг чемпион. 4 азы фæстæ Мæскуыйы рамбылдта йæ дыккаг сызгъæрин майдан. Гауызæй куы `рхызт, уæддæр Андиаты Сослан куыста спорты къабазы, стыр æвæрæнтæ йæм хæсгæйæ. Уыд Советон Цæдисы уæгъдибар хъæбысхæстæй иугонд командæйы разамонæг, футболон командæ "Алани"-йы президент. Сарæзта цалдæр спортивон скъолайы. Æнæфæцудгæ кад ын кæй уыдис, уый тыххæй йын Цæгат Ирыстоны æрвылаз аразынц йæ номыл конд ерыстæ. Ирыстойнаг богал-иу алы хатт дæр уыдис трибунæтыл. Хъыгагæн, фæстаг хатт ын уый нал бантыст. Гауызыл хъæбысæйхæцджытæ тох кодтой, Сослан дæр - афтæ. Æрмæст спорстментæ - кæрæдзиимæ, Андиаты богал та - уæззау низимæ. Æмæ фыццаг хатт уыцы тохы Андиаты Сослан фæхæрд... Пхалæгаты Светланæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv