Цæгат Ирыстоны пенсимæ ацæуыны кармæ чи хæстæг кæны, уыцы адæмæн сараздзысты сæ дæсныйад аивыны курс

Цæгат Ирыстоны пенсимæ ацæуыны кармæ чи хæстæг кæны, уыцы адæмæн сараздзысты сæ дæсныйад аивыны курсытæ. Программæ ахæсдзæн 6 азы. Уый тыххæй фехъусын кодтой республикæйы куыстдæттыны комитеты. Сывæллæттæм фæкæсыны отпусчы цы сылгоймæгтæ ацыдысты, уыдоны ахуырадæн дæр æрхъуыды кæндзысты хицæн проекттæ. Ахæм куыст æххæст кæндзысты национ проект «Демография»-йы фæлгæты. Ацы æмæ æндæр ахсджиаг фарстатыл æрныхас кодтой селекторон æмбырды. Разамынд ын лæвæрдта Уæрæсейы Фæллой æмæ социалон рæзты министр Максим Топилин. Æмбырды архайдтой нæ сæргълæууæг Битарты Вячеслав æмæ профилон уагдæтты разамонджытæ. Максим Топилин куыд бафиппайдта, афтæмæй национ проект «Демография» у ахсджиагдæр мадзæлттæй иу. Арæзт цæуы нæ бæстæйы президенты майы уынаффæтæм гæсгæ. Цæгат Ирыстон æмæ федералон центр ныридæгæн бафыстой цалдæр бадзырды. 3 азы цы сывæллæттыл нæма цæуы, уыдонæн рæвдауæндæтты уæлæмхасæн бынæттæ цæмæй саразой, уый тыххæй республикæ райсдзæн субсидитæ федералон бюджетæй. Уæлдай цæстдард - медицинон æххуыс фæхуыздæр кæнынмæ. Сæрмагондæй хистæр адæммæ фæкæсыны фадæттæм. Ныртæккæ сын се `нæниздзинады уавæрмæ кæсынц профилактикон æмæ диспансерон æркастыты руаджы. Уымæй уæлдай ма федералон бюджетæй Цæгат Ирыстонæн радих кæндзысты æхцайы фæрæзтæ 8 сæрмагонд хæдтулгæйы балхæнынæн. Сæ бындурыл арæзт æрцæудзысты социалон лæггæдты центрты мобилон къордтæ. Се `руаджы фæзындзæн фадат 65 азæй фылдæр кæуыл цæуы, уыцы ацæргæ адæмы медицинон уагдæттæм диспансеризацимæ ласынæн. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv