Ахуыры ног гæнæнтæ

Цæгат Ирыстоны Паддзахадон Университеты журналистикæйы факультеты 2-æм курсы студенттæн фадат ис сæ дæсныйады сусæгдзинæдтæ практикæйы базонынæн. Ахуыры рæстæг цы теоретикон зонындзинæдтæ райстой, уыдон кæндзысты фидардæр. Æрыгон журналисттæ сæ декан Хæбæлаты Фатимæимæ бабæрæг кодтой куыстуат «Де-Густо». Кæны фæткъуыты æмæ кæрдоты куыст. Студентттæ та хъуамæ сæ балцæй бацæттæ кæной æмбæлгæ æрмæг. Сæ арæхстдзинадæн æвдисæн уыд нæ уацхæссæг. Фæткъуытæ, кæрдотæ, нырыккон технологитæ - æппæт уыцы диссæгтæ хъæууон хæдзарадон куыстуат «Де-Густо»-йы фæллæйттæ сты. Уазæгуаты сæм æрцыдысты, Паддзахадон университеты журналистикæйы факультеты студенттæ. Суинаг дæснытæ тынг лæмбынæг кæсынц, куыст куыд цæуы, уымæ. Уæдæ агрономы ныхæстæм дæр къæрцхъусæй лæууынц. Журналистикæйы факультеты студенттæн фæзынд, æмбал кæмæн нæй, ахæм фадат. Практикæйы руаджы студенттæ сæхи цæстæй фендзысты куыстадон фæтк, афтæмæй та сæ адæмæн дæр бæстондæрæй дзурдзысты. Куыстуатыл сын экскурси йæхæдæг сарæзта йæ сæргълæууæг Дзиццойты Риммæ. Фæткъуы бæлæстæ зайын кæнынц сæрмагонд технологимæ гæсгæ. Пестицидтæй нæ пайда кæнынц. Уыцы куыст æнцон нæу, домы æрвылбоны фыдæбон. Куыстуаты сæргълæууæджы ныхæстæм гæсгæ, суинаг журналисттæ хъуамæ зоной нæ республикæйы авналæнтæ. Студенттæ канд теорийæ нæ, фæлæ практикон æгъдауæй ахæм хуызы бацæттæ кæныны хъæппæрис бахаста Цæгат Ирыстоны Паддзахадон Университеты журналистикæйы факультеты декан Хæбæлаты Фатимæ. Йæ ныхæстæм гæсгæ, ахам мадзалттæй пайда кæнгæйæ специалистты цæттæдзинад уыдзæн дзæвгар фылдæр. Сæ зонындзинæдтæ апарахат уыдзысты цардыуаджы алы къабазыл дæр куыд нæ республикæйы, афтæ нæ бæстæйы дæр. Кæронбæттæны суинаг журналисттæн арæзт æрцыдис пресс-конференци. Студенттæ фæрстытæ радтой куыстуаты сæргълæууæгмæ. Фембæлды хатдзæгтæм гæсгæ алы студент дæр хъуамæ ныффысса, цы федта, уый. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv