Сывæллæттæ æмхуызон сты

Инклюзивон ахуырады программæ Цæгат Ирыстоны ахастой 27-æм скъоламæ. Аутизмы æууæлтимæ сывæллæттæн дзы аразынц æппæт мадзæлттæ. Фыццаджыдæр, цæмæй иннæты æмрæнхъ ахуыр кæной æмæ сæхи иппæрдæй ма æнкъарой, уый тыххæй. Раздæр ахæм программæмæ гæсгæ куыстой 1-æм скъолайы. Цавæр æнтыстдзинæдтæ бафтыд хъæппæрисджынты къухы æмæ цы пайда у прогаммæ? Уый тыххæй - нæ дарддæры æрмæг. Ног ахуыры аз ацы сывæллæттæн ног скъолайы райдыдта. Сабыргай йыл фæцалх сты, зонгæ кæнынц се `мкъласонтимæ. Аутизмы æууæлтæ кæмæ раиртæстой, уыцы сывæллæттæн инклюзивон ахуырады программæ ныр æххæст кæнынц 27-æм скъолайы. Ныронг ацы программæмæ гæсгæ 4 азы куыстой æрмæстдæр Дзæуджыхъæуы 1-æм скъолайы. Сæрмагонд кълæстæн бахъуыд ног бынат ссарын. Афтæмæй æрбынæттон сты 27-æм скъолайы бæстыхайы. Маринæ Зафириду, проекты разамонæг: «Скъола дæнцæгæн хæссинаг у. Тынг разы дзы стæм. Ам ис æппæт хъæугæ мадзæлттæ, цæмæй ахуырадон процесс æнæкъуылымпыйæ цæуа, уый тыххæй. Иумæйаг тыхтæй сæрмагонд кълæстæ хъæугæ кусæнгæрзтæй сифтонг кодтам. Зын нын уыд 1-æм скъола ныууадзын, хи хæдзары хуызæн нын сси, бауарзтам æй. Фæлæ 27-æм скъолайæ дæр тынг бузныг стæм». Инклюзивон ахуырад республикæйы æнтысджынæй æххæст кæнынц. Къухы цы хорз бæрæггæнæнтæ бафтыд, уыдон - специалистты удуæлдай куысты фæрцы. Домæнтæм гæсгæ урокты сывæллæттæ иунæг нæ вæййынц. Алкæимæдæр дзы кусы сæрмагонд специалист. Уыдон сын феххуыс кæнынц ног æрмæг хуыздæр бамбарынæн. Уæдæ сæм хæдзармæ хæслæвæрд скæнынмæ дæр фæкæсынц. Сæ куыст сын æнцоныл чи банымайа, уый фæрæдийдзæн. Алы хъомылгæнæг æмæ ахуыргæнæг дæр æй зоны - сывæллæттимæ кусын зын у. Рынчын сабитимæ та - уæлдайдæр. Уый тыххæй ахуыргæнджыты рагагъоммæ бацæттæ кæнынц. Уымæй уæлдай ма сын æппынæдзух сæ зонындзинæтæ фылдæр кæнынц. Мæдинæ Дзанайты, сывæллæттæм цæстдарæг: «Зæгъæм, скъоладзау æрмæг нæ бамбæрста, ахуыргæнæгмæ лæмбынæг нæ хъуыста, уæд махæн нæ хæс у сывæллонимæ ногæй бакусын. Æрмæг ын бамбарын кæнын, скъоладзауæн баххуыс кæнын йæ хæслæвæрдтæ скæныны тыххæй». Ног скъолайы ахуырдзауты æмæ ахуыргæнджыты бахъæудзæн кæрæдзийы хуыздæр базонын. Аллæ Ногъайты, райдиан скъолайы ахуыргæнæг: «Тынг цымыдисаг сывæллæттæ нæм æрбацыдысты ахуыр кæнынмæ. Ног къласы нæм ис, аутизмы æууæлтæ кæмæ раиртæстой, ахæм 2 скъоладзауы. Кæй зæгъын æй хъæуы, æнцон нæ уыдзæн. Программæ нырма æрæджы райдыдтам фæлварын. Цæмæй мын ацы сывæллæттимæ æнцондæр архайæн уа, уый тыххæй мæхæдæг дæр мæхиуыл кусын. Кæсын хъæугæ чингуытæ æмæ æндæр æрмæджытæ». Программæйы разамонджытæ сæ зæрдæ дарынц, инклюзивон ахуырады кълæстæ кæй фæфылдæр уыдзысты, ууыл. Ацы фарста уæлдай ахсджиаг у районты скъолаты дæр. Цæмæй, йе `нæниздзинад хъыгдард кæмæн у, уыцы сывæллæттæ иннæты æмрæнхъ ахуыр кæной. Цæмæй сæм хъулон цæстæй мачи кæса. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv