Ахуыры бæрзæндтæм тырнынц

Цæгат Ирыстоны райдыдтой олимпиадæтæ математикæйæ 3-æмæй 6-æм кълæсты ахуырдзауты хсæн. Сæ хатдзæгтæм гæсгæ курдиатджын сывæллæтты бахæсдзысты математикон къордтæм. Специалистты ныхæстæм гæсгæ, ахæм секцитæ, æнæмæнг. хъæуынц. Сывæллæттæ дзы предмет бæстондæрæй фæахуыр кæнынц. Республикæйы алы районы дæр бæрæггонд æрцыд математикæ биноныгæй кæм ахуыр кæндзысты, ахæм скъолатæ. Дзæуджыхъæуы курдиатджын сывæллæтты ахуыр кæндзысты физикон-математикон лицейы æмæ 27-æм скъолайы. Сæрмагонд къордтæн сæ куыст райдайдзæн 1-æм октябры. Татьяна Придонянц нырма ахуыр кæны 11 къласы, республикон физикон-математикон лицейы. Фæлæ ныридæгæн зоны, профилон уæлдæрахуыргæнæндоны йын бынат кэй ис, уый. Уый та олимпиадæйы кæй рамбылдта æмæ диплом кæй райста, уый руаджы. Татьянæ йæхæдæг куыд зæгъы, афтæмæй математикæ хæрз чысылæй бауарзта. Математикæ æмæ информатикæ бæстондæрæй ахуыр кæныны программæ республикæйы парахат кæнынц фыццаг хатт. Проекты разамонæг Мæргъиты Неллийы ныхæстæм гæсгæ, программæйæн æмбал нæй. Фадат дæтты математикæ чи уарзы, уыцы сывæллæттæн сæ зонындзинæдтæ фæфидардæр кæнынæн.  Уыимæ, ахуырдзау кæм цæры, уый уæлдай нæй. Районты скъолаты гом кæнынц, бæстонæй кæм ахуыр кæндзысты сывæллæттæ математикæ, ахæм хайæдтæ.  Æппæт хъæугæ кусæнгарзæй сæ ифтонг кæнынц. Уым сывæллæттæ сæ уарзондæр предмет ахуыр кæндзысты 3-æмæй 6-æм къласмæ. Проект «Развитие математического образования РСО-Алания»-йы разамонæг Мæргъиты Нелли: «Проект арæзт у сæрмагондæй нæ республикæйæн. Йæ хæс у курдиатджын сывæллæтты рабæрæг кæнын æмæ сын сæ курдиаты рæзтæн баххуыс кæнын. Математикон кълæсты 6-æм къласмæ куы фæахуыр кæной, уæд дарддæр цæудзысты физикон-математикон лицеймæ». Математикæ æмæ информатикæимæ сæ фидæны дæсныйад чи бæттынц, уыцы сывæллæттæн ма арæзт цæуынц æндæр фадæттæ дæр. Фæцæттæ кæны кванториум дæр. Йæ арæзтад фæвæййы. Кусдзысты дзы хуыздæр специалисттæ. РЦИ-Аланийы ахуырад æмæ наукæйы министрады хайады сæргълæууæг Бататы Фатимæ: «Математикон лицейы арæзт цæудзысты математикон кълæстæ. Ацы аз сæ скусын кæндзыстæм. Дарддæр нæ фæлтæрддзинад æмбырд кæндзыстæм, пайда кæндзыстæм иннæты фæлтæрддзинадæй дæр. Æрбахондзыстæм хуыздæр специалистты. Архайдзыстæм, цæмæй математикон ахуырад нæ республикæйы рæза». Республикон физикон-математикон лицеймæ ахуыр кæнынмæ районтæй цы сывæллæттæ хъуамæ æрбацæуой, уыдонæн уыдзæн æппæт хъæугæ фадæттæ æмæ гæнæнтæ. Суанг ма цæрæнбынæттæ дæр. Уый тыххæй лицейы бæстыхайы арæзт æрцыд 17 хуыссæн уаты кæм ис, ахæм комплекс. Ис дзы цæрынæн æппæт уавæртæ. Фыццаг сывæллæттæ дзы æрцæрдзысты 1-æм октябры. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv