Ног цард заводæн

Цæгат Ирыстоны тагъд фæзындзæн куыстадон фæз КамАз-æн. Сифтонг æй кæндзысты завод «Бином»-ы. Уым фæнд кæнынц индустриалон паркæн бындур сæвæрын. Ныртæккæ уый фæдыл кусынц æмбæлгæ уавæртимæ. Ахъаз уыдзæн фылдæр куысты бынæттæ саразынæн. Заводы куысты дарддæры фæндтæ базыдтой нæ уацхæсджытæ. Завод «Бином»-ы 70 адæймаджы кусы. Хъахъхъæнынады министрады заказтæм гæгæ аразынц алыхуызон дзаумæттæ.Уæвгæ, гæнæнтæ сты бирæ. Йæ бон у ноджы фылдæр продукци уадзын. Йæ рæстæджы дзы 4000 адæймаджы куыста. Фæлæ фæстаг рæстæг сæ къæхтыл тыххæй лæууынц. Ныртæккæ цы родукци уадзынц, уымæн цалдæр уаты йеддæмæ нæ хъæуы. Аразынц алыхуызон техникæйæн æдасдзинады фæрæз, хонынц сæ предохранительтæ. Фæлæ тагъд рæстæджы сыхаг цехты скусдзысты хъомысджын станоктæ. Афæдзы райдиан заводы сæргъы æрлæууыд ног разамонæг. Уыимæ "Бином" федералон исбон нал у, фæлæ сси республикон. Цæгат Ирыстонæн ацы куыстуат тынг вазыгджын у. Уымæ гæсгæ, йæ уавæртæм лæмбынæгæй кæсы республикæйы промышленность æмæ транспорты министры хæдивæг Мадзаты Эльбрус. Йæхимæ райста хæс - цæмæй куыстуат къуырццæвæнæй рацæуа. Ныртæккæ куыстуаты æфснайынц æмæ зилынц бæстыхæйттæм. Бирæ азты дæргъы дзы тынг бирæ арæзтадон æмæ æндæр хауæццæгтæ сæмбырд. Цехтæ та, фыццаджыдæр, ссыгъдæг кæнын хъæуы. Куыстытæ куыд цæуынц, уый бæрæг кæны промышленность æмæ транспорты министр Хайдарбек Бутов. Йæ ныхæстæм гæсгæ, дзы æнтыстджынæй цæттæ кæнынц фæзтæ фидæны инвестортæн. Хайдарбек Бутов: «Завод йæ бон цас у, уый бæрц нæ кусы. Цæхтæ æмæ куыстæн чи бæззы, уыцы фæзтæ æгуыстæй лæууынц. Уый тыххæй мах архайæм, цæмæй завод йæ тых цас у, уый бæрц скусын кæнæм. Байдзаг æй кæнæм нырыккон хуыздæр технологитæм гæсгæ арæзт кусæнгæрзтæй æмæ техникæйæ. Инвестортæ бабæрæг кодтой завод. Базонгæ сты йæ хъомыс цас у, уыимæ, йæ тыхмæ. Сæхицæн бынæттæ равзæрстой, сцалцæг сæ кæндзысты æмæ дзы ног кусæнгарз сфидар кæндзысты». Рагагъоммæйы бæрæггæнæнтæм гæсгæ, завод «Бином»-ы бындурыл ног инвестицион проект куы скуса, уæд фæзындзæн 240 куысты бынаты дæр. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv