Уæлдæр ахуырад райсынæн Цæгат Ирыстоны пайда кæндзысты маделон капиталы æхцайы фæрæзтæй

Тагъд рæстæджы уæлдæр ахуыргæнæндæттæ сæ дуæрттæ ногæй байгом кæндзысты студенттæн. Бирæ бинонтæн сæ цотæн уæлдæр ахуырад радтын баст вæййы стыр хæрдзтимæ. Уыдонæн сæ кæцыдæр хай сæхимæ райстой абитуриентты кæстæр 'фсымæртæ æмæ хотæ. Уымæн æмæ сæ райгуырдимæ фæзынд фадат мадæлон капитал ахуырыл схардз кæнынæн. Афтæ нæ республикæйы 2019-æм азы 153 мадæлон капиталы сертификатæн се‘ хцайы фæрæзтæ схардз кодтой адæм сæ хистæр цоты ахуырыл. Æмткæй райсгæйæ та федералон закъон йæ тыхы куы бацыд, уæдæй нырмæ Цæгат Ирыстоны ахуырыл мадæлон капитал схардз кодтой 1388 бинонтæ. Сæ иумæйаг хæрдзтæ схызтысты 104 милуан æмæ 700 мин соммæ. Профилон уагдоны бæрæггæнæнтæм гæсгæ, Цæгат Ирыстойнаг фæсивæд алы азты мадæлон капиталæй цы ахуыргæнæндæттæн бафыстой, уыдоны 'хсæн сты нæ бæстæйы раззагдæр университеттæ æмæ институттæ. Зæгъæм, Ломоносовы номыл Мæскуыйы паддзахадон университет, нæ бæстæйы президенты цур адæмон хæдзарад æмæ паддзахадон службæйы Уæрæсейаг академи, Тимирязевы номыл адæмты хæлардзинады университет æмæ бирæ æндæр хъуыстгонд уæлдæр ахуыргæнæндæттæ. Уыимæ, Уæрæсейы пенсион фонды Цæгат Ирыстойнаг управлени республикæйы цæрджыты зæрдыл лæууын кæны, мадæлон капиталы фæрæзтæ ахуырыл схардз кæнынæн хъæуы цалдæр домæны сæххæст кæнын. Фыццаджыдæр, капитал цы сывæллоны райгуырды фæдыл ист æрцыд, ууыл хъуамæ 3 азы сæххæст уа. Цы сывæллоны дæттынц ахуырмæ, ууыл та хъуамæ 25 азæй фылдæр ма цæуа. Стæй ма цы ахуыргæнæндон равзæрстой, уый хъуамæ уа æнæмæнг Уæрæсейы. Фæсарæнты ахуыр кæнынæн мадæлты капиталæй бафидæн нæй. Ахуырæй уæлдай ма йæ схардз кæнæн ис цæрыны уавæртæ фæхуыздæр кæныныл, сывæллоны мадæн пенси æмбырд кæныныл, се 'нæниздзинад хъыгдард кæмæн у, уыцы сывæллæтты социалон адаптацийыл. Фæкæсинаг бинонтæн та дзы сæ бон исын у æрвылмæй хайгай. Уæ зæрдыл уын лæууын кæнæм, 2019-æм азы мадæлон капиталы бæрц у 453 мин сомй фылдæр. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv