Цæгат Ирыстонмæ Донецкæй ссыдысты лыгъд адæм

Раздæхдзыстæм Донецк æмæ Луганскы адæмон республикæтæй лыгъд адæмы уавæрмæ. Уыдон ныр медицинон æххуыс исдзысты лæвар. Сæрмагонд уынаффæ бафыста Михаил Мишутстин. Сæ цæрæнбынæттæй сыстæг адæмæн бар ратдзысты вакцинаци лæвар скæнынæн, Сæ бон уыдзæн медицинон æххуыс æвæстиатæй исын. Донецкы йæ цæрæнбынат æнæбары чи ныуагъта, уыдон иу къорд абон ссыдысты Цæгат Ирыстонмæ дæр. Æдæппæтæй 156 адæймаджы, се 'хсæн сывæллæттæ 112-æй. Æфсæнвæндаджы вокзалæй сæ фæхæццæ кодтой санаторий «Юность» æмæ «Тæмискъ»-мæ. Сабитæ æмæ скъолайы кары сывæллæттæн снысан кодтой бынæттæ сывæллæтты рæвдауæндæтты æмæ ахуырадон организациты. Ацы поезд Дзæуджыхъæумæ схæццæ абон райсомæй. Æхстыты бынæй æдас ранмæ ракодтой 112 сывæллоны. Семæ сæ ныййарджытæ кæнæ сæ хæстæджытæй исчи. Бирæтæн сæ бинонтæ Донецкы баззадысты. Ныр кæд сæ хæдзæрттæй дард сты, уæддæр сæ тас фæцыдæр. Сæ фæрсмæ æппынæдзух бархионтæ, зонгæтæ æмæ Æнæнхъæлæджы цауты министрады психологтæ. Ныртæккæ сæ райгуырæн бæстæ цы уавæры ис, уый лыгъд адæм зонгæ дæр нæ кæнынц. Кæцæй сты, уыцы горæт Ясиноватая ис Донецкы облæсты астæу. Уым чи баззад, уыдонимæ лигъдонтæн бастдзинад нæй. Сабиты куы ирвæзын кодтой, уæд иу æваст техникæйы тыхджын уынæр ссыд. Кæд нæ цæрæнуæттæ зæххимæ сæмраст сты, уæддæр æй нæ зонæм, зæгъгæ, катай кæнынц адæм. Æдæппæтæй Ирыстонмæ ссыд 156 адæймаджы. Сæ иутæ æрбынат кодтой Дзæуджыхъæуы, иннæтæ та районты. Къуырийы кæронмæ лыгъд адæмы нымæц схиздзæн мин адæймагмæ. Ласынц сæ регионы пансионаттæм, реабилитацион æмæ дзæбæхгæнæн центртæм. Абон санаторий «Юность»-ы бынæттæ æппæт дæр ахст æрцыдысты. Æнхъæлмæ сæм кæсынц Фыййагдоны, Мæздæджы, Тæмисчъы дæр. Тæмискъ лыгъд адæмы фыццаг хатт не суазæг кодта. Ам, йæ цæрæнбынат æнæбары чи ныууагъта, уыдон цардысты 2008-æм æмæ 2014-æм азты дæр. Уæд ам сывæллæттæн байгом кодтой скъола, ахуыртæ цыдысты æрвылбон. Санаторийы кусджытæ, ахуыргæнджытæ стæй бархионтæ уыцы фæлтæрддзинадæй спайда кæндзысты ныр дæр. Цæгат Ирыстог фыццаг лигъдонты суазæг кодта мартъийы райдианы. Лыгъд адæм ацæуынц медицинон æркаст. Пунктты сæм æнхъæлмæ кæсынц дохтырты къордтæ. Сбарынц сын сæ буары тæвд, туджы æлхъывдад. Сæ зæрдæ истæмæ куы фехсайы, уæд та бæлвырд информацы сæ 'мкусджытæн адæттынц. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv