Барбашовы Мемориалон комплексы арæзт æрцæудзæн хæсты хъайтарты къамты галерей

Цæгат Ирыстоны Мидхъуыддæгты министрад бæстонæй бавнæлдта Барбашовы фæзы мемориалон комплекс Фыдыбæстæйы Стыр хæсты 75 азы юбилеймæ байгом кæнын. Ныридæгæн æмбырд кæнынц хæсты хъайтарты къамтæ æмæ æппæт хъусынгæнинæгтæ дæр. Ацы хъæппæрис разынд республикæйы Ветеранты Советы минæвæрттæм. Мидхъуыддæгты министрад дæр ацы фæндыл сразы. Уæлахизыбонмæ Барбашовы фæзы арæзт æрцæудзæн хæсты хъайтарты къамты галерей. Куыд æй цæттæ кæнынц, уый тыххæй радзурдзæн нæ уацхæссæг Айларты Эмилия. Спайда кодтам Мидхъуыддæгты министрады ист кадртæй. Фыдыбæстæйы Стыр хæсты архайджыты къамтæ æрбахæссыны фадат ис алкæмæн дæр. Уый тыххæй хъæуы æрбацæуын республикæйы Мидхъуыддæгты министрадмæ, кæнæ профилон министрады историон музеймæ. Бетрозты Тотраз, Мидхъуыддæгты министрады сæрмагонд хайады сæргълæууæг: «Абоны бонмæ министрады нысан у нæ республикæйы цæрджытæй бæлвырд информаци райсын сæ хæстон хъайтарты тыххæй, уыимæ сæ къамтæ дæр нæм хъуамæ æрбахæссой. Фæстæдæр сыл бæстонæй бакусдзысты сæрмагонд адæм æмæ сæ банывыл кæндзысты. Дарддæр сæ сæрмагонд къамис ратдзæн. Ветеранты Советмæ æмæ республикæйы хицауадмæ». Уымæй уæлдай ма, къамтæ арвитæн ис электрон постмæ дæр. Республикæйы цæрджытæ сæхæдæг æрбахæссынц сæ хъæбатырты къамтæ. Бузныг фæзæгъынц Мидхъуыддæгты министрады разамынд æмæ кусджытæн ахæм егъау куыст кæй бакодтой, стæй æрыгон фæсивæдимæ æфсæддон-патриотон хъомыладыл кæй архайынц, уый тыххæй. Ацы ахсджиаг хъуыддагыл министрады кусынц бæстонæй. Сагкаты Тинæ, Цæгат-ныгуылæн районы социалон хайады кусæг: «Æз кусын цæгат-ныгуылæн районы социалон хайады.  Мæ хъус кæмæ дарын, уыцы сылгоймаг Раиса Евдокимова цæстæй нæ уыны. Радиойæ фехъуыста Барбашовы фæзы мемориалон комплекс уæрæхдæр кæй кæнынц, уый тыххæй. Уагътагъæддæр мæнæн бафæдзæхста, йæ дадайы къам арвитын. Æз ын æй ардæм æрбахастон. Æмæ сын зæгъын стыр бузныг, ацы хъуыддагыл чи архайы, уыдонæн». Мамыхъуаты Михаил æрбахаста йæ фыд Моисейы къам. Йæ цардæй ахицæн 1984-æм азы. Ныртæккæ Михæил йæхæдæг йæ фыды карæй ахызт. Нæлгоймаг йæ цæстысыгтæ нæ баурæдта, афтæмæй радзырдта йæ хъайтар фыды тыххæй. Йæ ном ын кæй сæнусон кæндзæн, уый йын æхсызгон у. Архайæг Мамыхъуаты Михаил: «Фæлтæртæ хъуамæ кæрæдзиимæ бастдзинад дарой. Ис сын, дæнцæг кæмæй райсой, ахæмтæ. Нæ фыдæлтæ фæзминаг кæй уыдысты, уый тыххæй сын хъæуы кад кæнын. Мидхъуыддæгты министрад ацы мадзал кæй сарæзта, уый тынг ахсджиаг хъуыддаг у æрыгон фæлтæры патриотон хъомыладæн». Алы бон дæр Мидхъуыддæгты министрады культурон центрмæ æрбацæуы республикæйы дæсгай цæрджытæ. Абоны бонмæ министрады информацион хайады ис 3 мин хъайтары номæй фылдæр. Мидхъуыддæгты министрады историон музейы кусæг Бæззаты Земфирæ: «Историон музейы кусджытæ кæнынц егъау куыст къамтимæ, цы æрмæджытæ æрбахæссынц, уыдонимæ иууылдæр. Ныридæгæн цы æрмæг сымбырд кодтам, уый бонæй -бон фылдæр кæны. Уæлдай цымыдисаг сты». Ирыстонæй хæсты быдырмæ чи ацыд æмæ йæ туг чи ныккалдта, уыдоны æппæт къамтæ æмæ хи æрмæджытæ æмбырд сты иумæйаг хайады. Уым специалисттæ æнæхъæн материал фæлхас кæнынц æмæ къамтæй электрон эскизтæ аразынц, уыдон стæй уыдзысты къамты галерейы. Рекламон агентад «Веста»-йы директор Наталья Провоторова: «Ныртæккæ кусæм къамтимæ, архайæм, цæмæй сæ дизайн ивд æрцæуа. Ногæй сæ скæндзыстæм. Алы адæймаг дæр, хæстмæ чи ацыд, уыдоны тыххæй хъуамæ бæстон информаци æвдыст æрцæуа. Бакæсгæйæ къамтæ уыдзысты рæсугъд». Ацы мадзалы фæрцы, Барбашовы фæзы хъайтарты нæмттæ сæнусон кæндзысты.  Мемориалон комплексы равдыст байгом кæндзысты ацы аз, Фыдыбæстæйы Стыр хæсты Уæлахизы 75 азы юбилеймæ. Йæ сæйраг нысан у, цæмæй хæсты быдыры архайджытæ æрыгон фæсивæдæй рох ма уой. Тохы быдыры йæ туг чи ныккалдта сæрибары сæраппонд, уыдоны нæмттæ хъуамæ адæмы зæрдæты цæрой. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv