Дзадджын чъиритæ

Цæгат Ирыстоны райдыдтой ирон чъиритæ фыцынæй ерыстæ. Цæуынц чемпионат «World Skills»-ы фæлгæты. Уæрæсейы 10 регионы хуыздæр къæбæргæнджытæ нæ бахæлæг кæндзысты сæ зонындзинæдтæ æмæ равдисдзысты, ирон чъиритæ куыд кæнгæ сты, уый. Чемпионат кадджын уавæры байгом Æрыдоны аграрон-техникон колледжы. Цæудзæн 1-æмæй 6-æм маймæ. Ерысгæнджытæ сты 16 адæймаджы, уыдонæй 6 хæрз æрыгæттæ. Сæ кармæ гæсгæ сæ адих кодтой 2 къордыл: хистæртæ æмæ кæстæртæ. Аргъ сын кæндзысты алыхуызон домæнтæм гæсгæ. Чъиригæнджыты ерыстæм ссыдысты Мæскуыйы, Мæскуыйаг облæсты, Стъараполы æмæ Краснодары крайы æмæ æндæр регионты минæвæрттæ. Ерысты архайæг Екатеринбургæй Алёна Табелина: «Нæ колледж æртыккаг аз архайы ацы дисциплинæйы. Фадат мын радтой архайынмæ, æмæ æз дæр сразы дæн. Дзадджын чъиритæ кæнын мæ зæрдæмæ фæцыд, уыимæ сæ ад дæр. Мастер мын равдыста раст сæ куыд кæнын хъæуы, радзырдта сæ истори, бацамыдта ирон чъиритæ кæныны сусæгдзинæдтæ». РЦИ-Аланийы ахуырад æмæ наукæйы министр Азымты Ирина: «World Skills ахуыртæ цымыдисаг сты. Сæ къухты арæхстдзинад æмæ зонындзинæдтæй та фæстæдæр спайда кæндзысты. Æрыгон специалисты фæлтæрддзинадæн ахуыртæ тынг хъæуынц. Ахъазаг сын сты. Нæ нысан чъиригæнджыты дæсныйад фæуæлдæр кæнын». _ Мы рядом в: vk.com/irystontv instagram.com/irystontv youtube.com/irystontv twitter.com/irystontv