Ног хуыз – «Медицинон электроникæ». Цæгат Кавказы хæххон металлургон институты студенттæн фæдат фæзынд ног дæсныйад райсынæн. Информацион технологиты æмæ электронон техникæйы факультеты цæттæ кæндзысты, медицинон кусæнгæрзтæ аразын чи зона, ахæм ног специалистты. Уæрæсейы ныхмæ санкцитæ нысангонд куы 'рцыд, уæд сæвзæрд ацы фæрста дæр. Æмæ йыл ныр бантыст бакусын. Рентгены къамтӕ фенынмæ чысыл æмæ къуххæсгæ «Неготоскоп» саразыныл электронон приборты кафедрæйы студенттæ сæхæдæг бакусдзысты. Сæ размæ бæрнон хæс æвæрд ис. Æппæты нырыккондæр медицинон кусæнгæрзтæ уадзын æмæ сæ райрæзтыл кусын. Медицинон электроникæ иртасын æмæ цымыдисаг дæсныйады сусæгдзинæдтæ базонын кæй фæнды, ахæмтæ ныридæгæн разынд. Абитуриенттæй иу Юнал Мамалыга каст фæцис Дзæуджыхъæуы электроникæйы колледж. Æрыгон адæймаджы фидарæй уырны, ацы къабазы гæнæнтæ егъау кæй сты, уый. Æмбæлгæ кадртæ нæ фаг кæны республикæйы рынчындæтты, поликлиникæты, стоматологон клиникæты. Арæх специалистты ӕрбахонынц æндæр горæттæй. Ныртæккæ та санкциты уавæрты медицинон кустуæттæ нырыккон техникæйæ сифтонг кæнын бæстæйæн тынг ахсджиаг хъуыддаг у. Ам цæттæ кæндзысты дæсны специалистты. Сæрмагонд программæ, формат æмæ практикон ахуырты æууæлты райрæзтыл куыст цæуы. Уыимæ ма кафедрæйы ахуыргæнджытæ цæуынц сæрмагонд ахуыртæ. Æххуыс сын кæндзысты Цæгат Ирыстоны медицинон академийы профессортæ-ахуыргæнджытæ. Ахуыры раззагдæртæ медицинон куыстуæтты цæудзысты практикæ, бынаты сын фадат уыдзæн медицинон кусæнгæрзты архайд фенын. Уымæй уæлдай ма Цæгат Кавказы хæххон металлургон институты хæстæгдæр рæстæг байгом уыдзæн поликлиникæ. Студенттæ сæ зонындзинæдтæ, арæхстдзинад ам æвдисдзысты. Ардæм бахауынмæ хъæуы раттын иумæйаг паддзахадон фæлварæнтæ математикæ æмæ уырыссаг æвзагæй. Æвзаргæ предметтæй та физикæ æмæ информатикæ. Профилон техникумтæ æмæ колледжты рауагъдонтæ дæттынц бацӕуӕн фæлварæнтæ.