Номхæссæг нысан

Цæгат Ирыстоны туристон нысан официалон æгъдауæй сфидар кодтой Дзæуджыхъæуы. Бакуыста йыл Артемий Лебедевы дизайн-студи. Мæй размæ йæ кой кодта æгас республикæ, уæлдай дзырддаг уыдис социалон хызæгты. Республикæйы туризмы комитеты сæргълæууæджы хæстæ рæстæгмæ æххæстгæнæг Кодзаты Зауырбеджы ныхæстæм гæсгæ, ног логотип нæ туризмы райрæзтæн у æвдадзы хос. Уæ зæрдыл уын æрлæууын кæндзыстæм, нысаны авд хохы кæй ис. Йæ аразгæйæ дизайнертæ спайда кодтой ирд ахорæнтæй. Нывæфтыдыл базонæн ис фыранчы хуыз дæр. Логотип у цæттæ, фæлæ, гæнæн ис, æмæ йæм ивддзинæдтæ дæр бахæссой – фæнысан кодта Кодзаты Зауырбег. Зæгъæм, ахорæнты хуыз сæ бон у баивын. Шрифт æмæ паттерн дæр сæ хуыз ивдзысты афæдзы афонмæ гæсгæ. Ивæн нæй æрмæстдæр йæ пропорцитæн. Логотип равæрæн уыдзæн алыхуызон дзаумæттыл, картонæй конд къоппытыл, фыссæнгæрзтыл æмæ æндæр ахæмтыл. Чъириты къоппæн та студи сарæзта хицæн логотип. Туризмы комитеты Артемий Лебедевы куыстæй разыйæ баззадысты. Сæ ныхæстæм гæсгæ, уæрæсейаг турист, фыццаджыдæр, хъуамæ банкъара Кавказы мидис. Логотип уыцы хъуыддаджы у раст къахдзæф. Презентацийы ма дзырдтой логотипæй пайда кæныны æндæр мадзæлтты тыххæй дæр. Сараздзысты ма туристон балцвæдтæ æмæ, семæ баст лæггæдтæ кæм æвдисдзысты, ахæм сæрмагонд сайт. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv