Дыгурон диалектыл арæзт æрцыд тоталон диктант

Ныр дыккаг хатт дыгурон диалектыл арæзт æрцыд тоталон диктант республикон наукон чиныгдоны, журнал «Ирæф» æмæ Дзыллон информацийы комитеты хъæппæрисæй. Арæзт у Æппæтдунеон мадæлон æвзæгты бæрæгбон æмæ зындгонд фыссæг, фронтовик Хуадонты Иссæйы 110 азы юбилейы кадæн. Архайдтой дзы Цыкола æмæ Хæзныдоны скъолайы ахуырдзаутæ, аивады кусджытæ, хуымæтæг адæм. Диктант сын бакаст республикæйы ирон æвзаг æмæ литературæйы сгуыхт ахуыргæнæг Хадаты Фузæ. Мадзал арæзт уыд дыууæ хайæ. Фыццаг хайы диктант фыстой зындгонд фыссæг Хуадонты Иссæйы роман «Устур горæти»-йы текстæй. Дыккаг хай та арæзт уыд викторинæйы хуызы. Архайджытæ равзæрстой 40 билеты дыгурон æвзагзонынады фарстаты фæдыл. Билеттæ сын бацæттæ кодта Таматы Таймураз. Ахæм диктанттæ ма араздзысты районты дæр. Тоталон диктант дыгурон диалектыл фыссынц мадæлон æвзаджы ахадындзинад æмæ æвзагзонынад цæрджыты ’хсæн раиртасынæн. Дзæуджыхæуы базарадон-экономикон техникумы дæр бæрæг кодтой мадæлон æвзæгты бæрæгбон. Сарæзтой кулинарон конкурс национ колориты хуызы. Уымæй уæлдай ма æндæр бæстæты кæфтытæ æмæ зарджытæ дæр акодтой. Сæ дæсныдзинадæн сын тæрхон кодтой æмхæларады хæдзары æмæ ахуырад æмæ наукæйы министрады уæнгтæ. Хуыздæртæн радтой кады грамотæтæ æмæ зæрдылдарæн лæвæрттæ. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv