Фидæны разамонджытæ

Æппæтуæрæсеон æркаст «Лидеры России»-йы финалмæ Цæгат Ирыстонæй рацыдысты 4-æй. Мæй ма баззад кæронбæттæнмæ, фæлæ архайджытæ разамонджыты миниуджытæ ныридæгæн æвдисынц. Аразынц социалон ахсджиаг проекттæ. Уый дæр æркасты домæнтæй иу у. Цавæр проекттæ сарæзтой, базондзыстут нæ дарддæры æрмæгæй. Цъитиджын хæхтæ æмæ æрдзон цыртдзæвæнтæй фæсивæды зæрдæ райы. Дыгургомы рæсугъддзинæдтæм кæсгæйæ, фæсивæд цымыдисæй хъусынц экскурсоводмæ дæр. Сæ балц райдыдта сæумæрайсомæй. Æрæфы районы æххуысцух бинонты сывæллæттæ сæ фæндаг ракодтой Советон туристон балцвæдтæй иуыл - «Цард», зæгъгæ. Се `нкъарæнтæ нæ сусæг кодтой. Этнографион экскурси сарæзтой Гæдзайты Феликсы социалон проекты фæлгæты. Уый у æркаст «Лидеры России»-йы архайæг. Рахаста ацы балцвæд сног кæныны хъæппæрис. Уый руаджы сывæллæттæ æрмæст æрдзон рæсугъддзинæдтæ нæ фендзысты, фæлæ ма сæ райгуырæн зæххы историйымæ дæр базонгæ уыдзысты. Феликс Гадзаов: «Мадзалы сæйраг нысан у сывæллæтты цымыдисаг æхсæнадон архайдмæ æрбаздахын. Стæй сæ æхсæнады цæрын дæр сахуыр кæнын. Сабитæ уынынц бархионты дæнцæгæнхæссинаг куыст, барвæндонæй цы хорз хъуыддæгтæ аразынц, уый. Бархионты змæлд дæр тыхджындæр кæны ацы проекты руаджы». Проект сырæзт бархионтæн æххуысы ресурсон центр «Доброволец Кавказа»-йы руаджы. Æппæтуæрæсеон æркаст «Лидеры России»-йы домæнтæм гæсгæ,архайæджы хъуыд социалон проект равдисын. Фæсивæд Дзæуджыхъæуы уынгты къултыл сныв кæнынц дисаджы нывтæ. Алкæцыдæр зæрдæмæдзæугæ æмæ мисджын. Æнæ бакæсгæйæ сæ рæзты ничи ацæуы. Хетæгкаты Константин: «Ахорæн æрмæг мæ къухты дæр никуы уыд. Раст зæгъгæйæ, ныв дæр раздæр никуы кодтон. Æмæ мын исты рауайа. уый мæ нæ уырныдта. Фæлæ мæ сразы кодтой. Æмæ мæм тынг цымыдисаг фæкаст. Сныв кодтон Сауроны цæст - фыццаг мæ сæрмæ цы æрцыд, уый. мæ зæрдæмæ тынг фæцыд. Мæ куыстæй ма мын æппæлгæ дæр ракодтой». «Стрит-арт», зæгъгæ, аивады йæ тыхтæ бавзарын кæй бафæнды, уыдон арæхдæр сæ куыстыты февдисынц сæ хъуыдытæ æмæ зæрдахаст. Эмилия Пащенко: «Мæ зæрдахаст, ме нкъарæнтæ равдыстон. Нывкæнын мæнæн у тынг ахсджиаг мæ царды. Мæ куысты равдисын мæ миддуне, мæ алыварс цы цæуы, уый». Проект арарзджытæ æрмæст æппæтуæрæсеон æркаст «Лидеры России»-йы домæнтæ нæ сæххæст кодтой. Фæндыд сæ ацы мадзал афтæ саразын, æмæ сæ зæрдæйы арф фæд куыд ныууадза. Национ музыкæйы зæлтæм хъусгæйæ, кæй фæндыд, уый йæ дæсныйад æвдыста. Уыд дзы фадат арты раз хи ахъарм кæнын æмæ тæвд цай бацымынæн дæр. Фестивалы бацархайынмæ фæсивæд æрбацыдысты суанг сыхаг регионтæй дæр. Ацы мадзалыл сæ куыст нæ фæуыдзысты. Æртæ мæйы иу хатт иу къулыл нывтæ сног кæндзысты. Сæ архайдмæ хондзысты хæдахуыр нывгæнджытæ, профессионалтæ æмæ туристты. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv