Абон йæ 75 азы юбилей бæрæг кæны зындгонд хореограф, ансамбль «Алан»-ы солист Плиты Нодар. 19 азы фæархайдта паддзахадон ансамблы къорды. Гастрольтимæ уыд æгас Советон Цæдисы, Польшæ, Болгари æмæ Чехословакийы. 1983-æм азы кафыд зындгонд гуырдзиаг ансамбль «Сухишвили»-йы. 6 азы фæстæ та æрбазæхт Цæгат Ирыстонмæ. Ахъазыд киноныв «Человек в зелёном кимоно»-йы сæйраг ролы. Сергей Меняйло арфæйы ныхæстæ йæ юбилейы фæдыл ракодта артистæн. Республикæйы разамонæг куыд фæбæрæг кодта, афтæмæй йе 'стыр курдиат, фæллойуарзондзинад æмæ кафджыты аивадыл æнувыддзинады 'руаджы Плиты Нодар сси ирон национ культурæйы ирддæр кусджытæй иу. Цы æвæрæн бахаста Ирыстон æмæ Кавказы хореографион аивад парахат кæнынмæ, уымæн та аккаг аргъ скæнын зын у. Уæ зæрдыл уын æрлæууын кæндзыстæм, Плиты Нодар у Советон Цæдисы сгуыхт артист, Цæгат æмæ Хуссар Ирыстоны адæмон артист, Абхази æмæ Цæцæны республикæты сгуыхт артист.