Информацион технологиты æмæ бастдзинады разамынды хъæппæрисæй Белоруссиимæ сарæзтой телебастдзинад

Комкоммæ телебастдзинад сарæзтой информацион технологиты æмæ бастдзинады разамынд, мыхуыры æмæ дзыллон коммуникациты комитеты æххуысæй. Ныхас кодтой Белоруссийы дзыллон-информацион фæрæзты минæвæрттимæ. Сбæрæг кодтой ног технологиты ахадындзинад нырыккон царды. Уымæй уæлдай ма æрдзырдтой регионалон дзыллон-информацион фæрæзтæ нымæцон хызмæ раивын кæй хъæуы, уый тыххæй дæр. Информацион технологитæ ныртæккæйы царды стыр ахъаз кæй сты, уый дызæрдыггаг нæу, зæгъынц Цæгат Ирыстоны информацион технологиты æмæ бастдзинады разамынды хицау Сæлбиты Алан æмæ нæ республикæйы мыхуыры æмæ дзыллон коммуникациты комитеты сæргълæууæг Фидараты Юрий. Уыдон комкоммæ телебастдзинады фæрцы æрдзырдтой Белоруссийы регионалон дзыллон-информацион фæрæзты минæвæрттимæ. Сæйраг темæ: Регионалон дзыллон-информацион фæрæзтæ рапарахат кæнын сайтты æмæ социалон хызæгты. Сæлбиты Алан куыд бафиппайдта, афтæмæй ныртæккæ информацион технологитæ царды ахсынц раззагдæр бынат, уыимæ алы дæсныйады къабазы дæр. Уымæй уæлдай хъуамæ, нымæцон технологитимæ чи кусы, уый зонгæ уа сæ сæйраг домæнтимæ дæр. Æмæ хъуамæ æхсæнад уыцы информацион технологитимæ æмдзу кæна. Уый тыххæй та хъуамæ хъæрзхъæд æмæ оперативон æгъдауæй традицион дзыллон-информацион фæрæзтæ къæпхæнгай рахизой нымæцон хызæгтæм. Белоруссийы информацион агентад «Sputnik» -ы æрæмбырд сты бынæттон регионалон информацион фæрæзты разамынд æмæ сæ кусджытæ. Уыдон байхъуыстой нæ республикæйы минæвæрттæм æмæ сæм радтой сæхи фæрстытæ. Уый фæдыл Сæлбиты Алан æмæ Фидараты Юрий та Белоруссийы регионалон журналисттæн фæхай кодтой сæ фæлтæрддзинадæй, радзырдтой, нымæцон хызæгтæ цы пайда хæссынц, уый тыххæй. Мадзалы сæйраг нысан у, цæмæй традицон информацион фæрæзтæ нымæцон хызæгтæм сабыргай рахизой æмæ журналисттæ ног мадзæлттæй æххæстæй пайда кæнын райдайой. Æмæ ма уыимæ æрмæг æнцонæмбарæн куыд уа. Ахæм практикон семинартæ регионалон дзыллон-информацион фæрæзтæн сты пайда, зæгъынц мадзал аразджытæ. Фидæны ма информацион технологиты æмæ бастдзинады управленимæ ис бирæ фæндтæ. Фæнды сæ рауадзын сæрмагонд ахуырадон-методикон æрмæджытæ. Уыдоны фæрцы дзыллон-информацион фæрæзты чи кусы, уыдон базонгæ уыдзысты ног технологиты сусæгдзинæдтæ. Къутæрты Аидæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv