2019-2020-æм азты Уæрæсейы цæрджытæн сараздзысты диспансеризаци

Уæрæсейы хистæр кары адæмæн дзыллон диспансеризаци скæндзысты 2019-æм æмæ 2020-æм азты. Сæрмагонд уынаффæ бафыста нæ бæстæйы премьер-министр Дмитрий Медведев. Гæххæтт равæрдтой официалон интернет-порталы. Диспансеризацимæ сæ цæст дардзысты Росздравнадзор, æнæмæнг медицинон фæдзæхстады федералон æмæ территориалон фондтæ, стæй ма медицинон фæдзæхстады организацитæ. Иуæй-иу министрадтæн бабар кодтой профилактикон медицинон æркастытæ æмæ диспансеризаци адæмы 'хсæн парахат кæнын. Уыцы куыст кæнынц æнæниздзинад хъахъхъæныны, рухстауынад, наукæ æмæ ахуырад, бастдзинад, спорт, транспорт æмæ фæллойы министрадтæ. Раздæр ма Дмитрий Медведев бафыста Уæрæсейы лæвар медицинон æххуысы паддзахадон программæмæ ивддзинæдтæ бахæссыны уынаффæ. Уыдон хаудысты диспансеризацимæ дæр. Ног домæнтæм гæсгæ, ахæм иртасæн куыст æмæ профилактикон æркастытæ æрмæст бонæй кæнæн нæ уыдзæн, фæлæ ма изæрæй дæр. Суанг ма сабаты дæр. Ацы аз диспансеризаци хъуамæ ацæуой 61 милуан уæрæсейаджы. Уыцы-иу рæстæг вице-премьер Татьяна Голикова фæбæрæг кодта, 47 уæрæсейаг регионы диспансеризаци æххæстæй кæм скæнæн ис, ахæм поликлиникæтæ æмæ рынчындæттæ кæй нæй. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv