Беслæны хойраджы комбинат кæны халсартæ æмæ дыргъты куыст

Беслæны хойраджы комбинат кусын райдыдта 1962 азы. Уæдæй абонмæ комбинаты фæллойгæнджытæ зæрдиагæй архайынц канд нæ республикæ нæ, фæлæ ма Уæрæсейы иннæ регионты дæр хæрзад халсартæ æмæ дыргътæй ифтонг кæныныл. Сæ продукци сын агурынц нæ бæстæйы алы къуымты. Ныр та уал комбинаты зымæгмæ цæттæ кæнынц джитъритæ. Сæ куысты сусæгдзинæдтæ раргом кодтой не сфæлдыстадон къордæн дæр. Цæхджынтæ гæнгæ сæ баййæфта Хуасдзауты Алинæ. Халсартæ зымæгмæ бацæттæ кæнынмæ ацы куыстуаты хорз арæхсынц. Джитъритæ уал фыццаджыдæр ныккæнынц сæрмагонд ваннæйы. Уым хъуамæ уазал доны 8-10 сахаты баззайой. Афтæмæй, дам, цæхджынæй къæрццытæ хуыздæр кæндзысты. Уæдæ сæ ад дæр фæхуыздæр уыдзæн. Уыйфæстæ сæ хæрзæхсад ныккæнынц. Дарддæр халсартæ сæ фæндаг ракæнынц иртасæн стъолмæ. Ам джитъритæ сæ асмæ гæсгæ ахицæнтæ кæнынц. 8 сантиметрæй стырдæр чи вæййы, уыдон аиуварс кæнынц. Афтæмæй банкæтæм сæ фæндаг кæронмæ æрхæццæ вæййы. Кусджытæ сæ уым афснайынц. Тыджыты Маринæ, комбинаты кусæг: «Махмæ куы æрбахауынц джитъритæ, уæд сæ æвæрын райдайæм банкæты. Зын куыст нæу. Архайæм, цæмæй сæ мидæг рæсугъд бадой. Хъуамæ, банкæ чи байгом кæна, уымæн бæрцуаты `ддаг бакаст йæ цæсты ахада. Бонмæ нын бирæ бантысы. Нæ сæйраг хæс у, цæмæй нæ продукци хæрзхъæд уа. Нæ цехы кусджытæ ууыл зæрдиагæй архайынц». Банкæты джитъритæ æвæрын куы райдайынц, уый агъоммæ уал сыл тæвд дон æркалынц. Семæ ма сын сæвæрынц алыхуызон хъацæнтæ. Цæмæй халсартæ хæрзад уой æмæ уый къухы куыд хъуамæ бафта, уый бæлвырдæй зоны Дзампаты Беллæ. Комбинаты кусджыты арæхстджын фæллойы руаджы джитъритæ дæргъвæтин рæстæг вæййынц хæрзад. Банкæтæ рарæгъ кæнынц сæ скълады, уым сæм 2 къуырийы сæ хъус фæдарынц. Искуы иу хатт дзы бафиппайынц, кæмдæр дзы уæлдæф кæй аззад, кæнæ та банкæйы сæр фаг бæстон æхгæд кæй не `рцыд. Уый сæм тынг стæм хатт æрцæуы. Сæ продукци сын алы рæтты кæй агурынц, уый йæ хæрзхъæддзинадыл дзурæг у. Фылдæр æй ласынц Уæрæсейы цæгатварс хаймæ. Ацы аз хъуамæ фæзыной нæ республикæйы дуканиты дæр. Хомаг та сæм бафты Мæздæг æмæ Ольгинскæйæ. Фæлæ сæ ацы аз сæ ных Кæсæг-Балхъармæ дæр бахъуыд саразын. Боны ахасты уавæртæ сæ иучысыл атыхсын кодтой. Уæвгæ, канд джитъриты куыст нæ кæнынц. Иннæ халсартæ æмæ дыргътæ дæр сæ рох не сты. Лекты Руслан, директор: «Ис нæм сæрмагонд къæлиндар. Кусæм уымæ гæсгæ. Кæнæм дыргътæй вареннæтæ. Давон куы фæзыны, уæд уыимæ дæр бакусæм. Чысыл фæстæдæр райдайдзыстæм пъæмидоримæ кусын. Афтæ - цывзыйы цъæрттимæ дæр. Раст Нарты хойраджы ад фæкæны, бауырнæд уæ. Дыккаг аз кæнæм уыцы куыст, æмæ нын æхсызгон у, адæмы зæрдæмæ кæй фæцыдис, уый. Уæдæ туацъынæмыгæй цы хойрæгтæ сарæзтам, уыдон дæр фæлхасгæнджыты цæсты сахадыдтой. Фæстаг рæстæг ма нæм ногæй цы фæзынд, уый у сурвых дзидза. Афтæ нæм каст, æмæ йын адæм йæ ад ферох кодтой. Мах æй кæнæм æрмæст стуры фыдæй. Ныртæккæ уал йæ бæрц чысыл у, уымæн æмæ йæ хæрдзтæ бирæ сты. Ссарæн æй ис нæ республикæйы дуканиты». Беслæны комбинат кусы 1962-æм азæй абонмæ. Уыцы рæстæгмæ дзы бирæ ивддзинæдтæ `рцыд. Фæлæ иу хъуыддаг æнæивгæ у. Сæ продукци иннæты хуызæн уымæн нæу, æмæ йæ аразынц æрмæстдæр экологон æгъдауæй сыгъдæг хомагæй. Фидæнмæ ма сæм бирæ фæндтæ ис. Хæстæгдæр рæстæг хъуамæ райдайой майонез æмæ кетчуп уадзын дæр. Хуасдзауты Алинæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv