Цæгат Ирыстоны промышленность æмæ транспорты министр Хайдарбек Бутов бабæрæг кодта куыстуат «Абат»

Цæгат Ирыстоны промышленность æмæ транспорты министр Хайдарбек Бутов йæ куысты фæдыл бабæрæг кодта нымæтæй хуыд эко-дзаумæтты куыстуат «Абат». Уый кусы 2015-æм азæй нырмæ. Хъуыстгонд у йæ цымыдисаг хуызы хуыд дзаумæттæй. Ныры онг сæ зонынц æрмæст нæ республикæйы нæ, фæлæ ма фæсарæнты дæр. Бæлвырддæр хабæрттæ базыдтой нæ уацхæсджытæ. Хуымæтæг хъуымæцтæй хуыд дзаумæттæ нæ, фæлæ нымæтæй. Ахæм хуызы дзаумæттæ хуыйынц нæ республикæйы 2015 азæй нырмæ. Цымыдисаг сты уымæй, æмæ нымæт цæмæй кæнынц, уыцы къуымбил ласынц Германи æмæ Италийæ. У пайда адæймаджы æнæниздзинадæн. Уыимæ ма дзаумæттæ 540 граммæй фылдæр нæ ласынц. Уымæй уæлдай ацы дзаумæтты адæймаг хид нæ кæны. Хуыд цæуынц сæрмгондæй адæймагæн йæ буары скондмæ гæсгæ. Уыимæ ма дзаумæттæн сæ фылдæрыл нæй сынкытæ, фæлæ сыл ис рæсугъд æмæ аив нывæфтыдтæ. Æрæджы та ма дзаумæттыл райдыдтой хуыйын орнаменттæ. Æппæт ацы куыстытыл бацархайдта, эко-товартæ чи кæны, ахæм организаци. Уый фæдыл Дзæуджыхъæуы траспорт æмæ промышленносты министр Хайдарбек Бутов абон æркаст Бзарты Аланæйы куыстуатмæ, цæмæй йæхи цæстæй фена, цавæр ахадындзинад ын ис, уый. РЦИ-Аланийы траспорт æмæ промышленносты министр Хайдарбек Бутов: «Мах абон ардæм æрбацыдыстæм, куыстуат ныртæккæ цавæр уавæры ис, уый нæхи цæстæй фенынмæ. Ацы бизнес-проект пайда у нæ республикæйæн. Уымæн æмæ йын ис стыр ахадындзинад. Куыд зонæм, афтæмæй фæсарæнты ныртæккæ кусынц ахæм методикæмæ гæсгæ. Чысыл куыстуæтты фæрцы арæзт цæуы сæ экономикæ. Уыимæ ма ацы бизнесы ис архайæн, æгуст чи у, уыцы адæмæн дæр. Хæдзары чи бады, стæй студенттæн дæр». Нæ рагфыдæлтæ дæр раздæр кодтой нымæтын дзаумæттæ. Ныртæккæ дæр ма республикæйы иуæй-иу хъæуты ис, къуымбилæй нымæт чи рауайын кæны, ахæм адæм. Фæлæ ацы куыстуат «Абат»-ы фæрцы ныридæгæн адæмæн сæ бон у балхæнын буарæн рог æмæ пайда дзаумæттæ. Нымæтæй конд дзаума сцæттæ вæййы 5 бонмæ. Фæлæ йæ цæмæй бахуыйай, уый тыххæй йын хъæуы бирæ тыхтæ. Куыстуаты генералон директор Бзарты Аланæ нын куыд радзырдта, афтæмæй йæм ис бирæ фæндтæ æмæ хъуыдытæ. Куыстуат «Абат»-ы генералон директор Бзарты Аланæ: «Ахæм хуызы нымæтимæ нырма ничи куыста. Уый махæн тынг æхсызгон у. Нæхи цæттæ кæнæм бæстонæй кусынмæ. Куыд уынут, афтæмæй дзаумæттæ сты цымыдисаг, аив æмæ рæсугъд. Ис сыл хуыд алыхуызон дуртæ æмæ нывæфтыдтæ. Уыимæ ма нæ эко-дзаумæттæ хъуыстгонд сты Англи æмæ Италийы дæр». Нæ республикæйы траспорт æмæ промышленносты министры ныхæстæм гæсгæ, Бзарты Аланæйæн хъуамæ баххуыс кæной сæрмагонд бæстыхайæ. Уымæ гæсгæ та куыстуат «Абат»-ы генералон директор 1 февралы æнхъæлмæ кæсы адæммæ. Хъуамæ саразой сæрмагонд дæсныйад æвдисæг ахуыртæ. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv