Цæгат æмæ Хуссар Ирыстоны фæсивæдон театрты фестиваль «Амыраны рухс 2020»

Дзæуджыхъæуы уыдзæн Цæгат æмæ Хуссар Ирыстоны фæсивæдон театрты фестиваль «Амыраны рухс 2020». Уый тыххæй не 'сфæлдыстадон къордæн фехъусын кодта проект «Амыраны рухс»-ы автор Цыбырты Хетæг. Йæхæдæг куыд фæбæрæг кодта, афтæмæй ацы фестиваль ныр арæзт æрцыд цыппæрæм хатт. Ацы аз та ма дзы бацархайдзысты Хуссар Ирыстоны фæсивæдон театртæ. Тагъд рæстæджы хъуамæ Цæгат æмæ Хуссар Ирыстоны 8 районы ахицæн уа æвзæрстыты къæпхæн. Дарддæр уæлахиздзаутæ сæхи равдисдзысты Дзæужыхъæуы. Уый фæдыл нæ горæты арæзт æрцæудзæн гала-концерт. Цы равдыстытæ бацæттæ кæной, уыдон та уыдзысты æрмæстддæр ирон æвзагыл. Ацы фестиваль сæрмагондæй арæзт цæуы ирон драматурги æмæ театры бындурæвæрæг Брытъиаты Елбыздыхъойы райгуырæн бонмæ. 2019 азы ацы фестивалы бацархайдтой 700 адæймагæй фылдæр. Уыдоны 'хсæн: скъоладзаутæ, студенттæ æмæ æрыгон артисттæ. Проекты сæйраг нысан у, цæмæй фæсивæд æмхиц кæной ирон аивадмæ æмæ театрмæ. Уыимæ ма хуыздæр зоной сæ мадæлон æвзаг. Жюрийы уæнгтæ хатдзæгтæ скæндзысты сæрмагонд номинацитæм гæсгæ: «Драмон спектакль», «Ирон адæмон сфæлдыстадон равдыст», «Ирон аргъау», «Эстрадон сатирикон миниатюрæ», «Аивадон бакаст» æмæ «Сфæлдыстадон эксперимент». _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv