Радон æркаст

Нæ республикæйы хицауады сæрдар Тускъаты Таймураз абон кусæг балцы рæстæг бæрæг кодта республикæйы ахсджиаг объекттыл. Фыццаг уал бабæрæг кодта тарнизы диспансер æмæ федта, йæ арæзтад куыд цæуы, уый. Цалцæггæнæн куыстытæ кæронмæ фæуыдзысты сентябры. Арæзт цæуынц æртæ ног бæстыхайы 8, 9 æмæ 10 корпустæ. Уый фæстæ сæ сифтонг кæндзысты ног медицинон кусæнгæрзтæй. Цæмæй куыстытæ бæлвырд рæстæджы æмгъуыдмæ фæуой, уый тыххæй куысты рæстæг фæдæргъвæтин. Кусæг балцы ма Тускъаты Таймураз бабæрæг кодта Национ музей. Равдыстыты залы хъуамæ рæхджы саразой фыццаг æкспозици, равæрдзысты дзы Дзанайты Азанбеджы куыстытæ. Дзæуджыхъæуы 27-æм скъола та ахуырадон азмæ цæттæ уыдзæн 25-æм августмæ. Объекты алывæрстæм базылдысты, банывыл кодтой скъолайы спортивон фæз. Бынат дзы уыдзæн 650 сывæллонæн. Куыстытæ цæуынц, 12-æм микрорайоны цы ног скъола аразынц, уым дæр. Йæ фæзуат у 6000 квадратон метры. Афæдзы кæронмæ та кусын райдайдзæн 18-æм микрорайоны сывæллæттæн ног рæвдауæндон. Тускъаты Таймураз уыди Беслæны дæр. Уым кæронмæ фæхæццæ кæнынц районы сæйраг рынчындоны цалцæггæнæн куыстытæ. Сентябры ног бæстыхай сифтонг кæндзысты хъæугæ медицинон кусæнгæрзтæй. Аразынц ма дзы сывæллæтты дыууæ рæвдауæндоны. Уыдзæн дзы 240 бынаты. Уый фæстæ Хицауады сæрдар федта Заманхъулы культурæйы хæдзар куыд аразынц, уый. Куыстытæ райдыдтой майы мæйы. Уыдзæнис дзы 100 бынаты. Байгом дзы кæндзысты музыкалон æмæ кæфтыты къордтæ. Пъланмæ гæсгæ, аивадуарзджытæн йæ дуæрттæ байтынддзæн иннæ аз, уалдзæджы. Ныридæгæн та сцæттæ спортивон фæз. Аразынц æй 2 мæйы. 800 квадратон метрыл æрæвæрдзысты тренажертæ æмæ спорты алы хуызтæн бæзгæ фæзтæ. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv