Цæгат Ирыстоны æнтыстджынæй рæзы фыстæ дарыны куыст

Цæгат Ирыстоны æнтыстджынæй рæзы фыстæ дарыны куыст. Уый тыххæй фехъусын кодта республикæйы хъæууон хæдзарады министр Уазиты Хъазыбег Цæгат Ирыстоны сæргълæууæг Битарты Вячеславимæ кусгæ фембæлды рæстæг.  Æмбырды ма дзырдтой республикæйы хъæууон хæдзарады райрæзтыл. 15-æмæй 16-æм августмæ Цæгат Ирыстоны уыдзæн «Картофы быдырты Æппæтуæрæсеон бон-2019». Уазиты Хъазыбег куыд бафиппайдта, афтæмæй ахæм егъау мадзал нæ республикæйы фыццаг хатт арæзт æрцæудзæн. Нæ бæстæйы 36 регионæй картофы куыст чи кæны, уыдонæн сæ хуыздæр специалисттæ сæ фæлтæрддзинадæй кæрæдзи хайджын кæндзысты. Уымæй уæлдай ма æрдзурдзысты къабазы райрæзтыл дæр. Мадзалы архайдзысты Уæрæсейы хъæууон хæдзарады, ахуырад æмæ наукæйы министрадты минæвæрттæ, агропромышленон комплексты разамонджытæ, къабазы цæдистæ æмæ ассоциациты минæвæрттæ. Уазиты Хъазыбег ма куыд фехъусын кодта, афтæмæй ивгъуыд аз дыууæ хатты фæфылдæр сты  фысы дзугтæ. Æдæппæтæй 31 мин сæры. Ацы аз фосы бæрц фæнд кæнынц 50 минмæ стæрын. Профилон министры ныхæстæм гæсгæ æнтыстдзинæдтæ ис зæхкусджытæм дæр. Афтæмæй ацы аз æнхъæлмæ кæсынц хорз тыллæгмæ. Фæнд кæнынц иу гектарæй хор 60 центнеры сæмбырд кæнын. Ивгъуыд аз цæгатирыстойнаг зæхкусджытæ фыццаг хатт мæнæу сæмбырд кодтой 762 мин тоннæйы. Ацы æз æнхъæлмæ кæсынц 800 мин тоннæйы бæрæггæнæнмæ. Фембæлды рæстæг Битарты Вячеслав уæлдай æргом аздæгъта йæ хæслæвæрдтæ куыд æххæстгонд цæуынц, уымæ. Бæлвырддæр та хъæрмуæттæ хъæууон хæдзарадтæн раттыны хъуыддагмæ. Уазиты Хъазыбег куыд зæгъы, афтæмæй программæйы райрæзтыл кусынц, фæлæ дзы ййафынц къуылымпыдзинæдтæ. Хъæууон хæдзарады министрады специалисттæ сæрмагонд фæткмæ гæсгæ сæмбырд кодтой курдиаттæ. Конкурс арæзт уыд дыууæ къæпхæнæй. Ныртæккæ расиддзысты æртыккагмæ, уымæн æмæ 22 хъæрмуатæй 3-йæн хицау нæй. Министр куыд загъта, афтæмæй фермерты курдиаттæм æнхъæлмæ кæсынц. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv