Сабиты цинæн

Зæрдæмæдзæугæ бæрæгбон Дыгурон драмон театры актертæ бацæттæ кодтой Лескены цæрджытæн. Фæхай сын кодтой сæ аивады тæмæнæй. Ахæм егъау лæвар йе `мхъæуккæгтæн ракодта Хидирты Батрадз. Артисттæ сæ дæсныйад æвдыстой культурæйы галуаны ног сценæйыл. Мадзал ацыд хæдахуыр къордты æмзæрдион гастрольты фæлгæты. Лескен бабæрæг кодта нæ уацхæсджыты къорд дæр. Цы хъæуы цæмæй адæймаг йæхи амондджындæрæй банкъара? - йæ сабибонтæ æрхъуыды кæнын. Хистæртæй хъауджыдæр сывæллоны зæрдæ цингæнаг у, стæй сæ уырны аргъæутты бæстæ æцæгæйдæр кæй ис уый. Дыгуры драмон театр уыцы аргъау Лескены сывæллæттæн балæвар кодта. Сæ ныййарджыты хъæбысты бадгæйæ сæ цинæн кæрон нал уыд. Цæстæнгас сценæйæ нал хицæн кодта. Артистты курдиат фенынмæ æрбацыдысты æгас хъæуæй. Залы къух бавæрæн нæ уыд. Бацæуæн та йæм лæвар уыд. Бынæттон цæрæг Хидирты Батрадз æй куы базыдта йæ райгуырæн хъæумæ Дыгурон театр æрцæудзæн зæгъгæ, уæд спектакльмæ билеттæ иууылдæр балхæдта æмæ сæ йе мхъæуккæгтæн байуæрста. Дзæуджыхъæуы сабитæ спектакль «Тузик æмæ æхсырыцъæрттæ» раджы бауарзтой. Лескены сывæллæттæ йæ федтой фыццаг хатт æмæ сæ зæрдæйы арф фæд ныууагъта. Уæвгæ бæрæгбон ууыл нæ фæци. Культурæйы галуаны кæрты сабитæн сарæзтой хъазæн фæз. Байуæрстой сын адджын бæмбæг, скодтой сын аквагрим, уагътой сапоны таппустæ, хъазыдысты аниматортимæ дæр. Бынæттон культурæйы галуан бындуронæй цалцæггонд куы æрцыд ууыл рацыд мæй. Базылдысты йæм хъæуты культурæйы райрæзты сæрмагонд программæйы фæлгæты. Ныр йæ хуыз скалдта æмæ дзы уазæгуаты æнхъæлмæ кæсынц республикæйы æндæр театртæм дæр. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv