Дун-дунейы сусæгдзинæдтæ базонын чи бафæлвары, уый уайтагъд бамбары æрвон дунейы æгæрондзинад. Æрвон буæрттæ ацы сывæллæтты тынг цымыдис кæнынц, суанг ма космосон тыгъдад иртасынимæ дæр сфæнд кодтой сæ цард сбæттын. Æрмæст фарон Космонавтикæйы скъола бабæрæг кодтой 4 мин сабийы æгас республикæйæ. Æмæ цæмæй сæ тырнындзинад фылдæрæй-фылдæр кæна, уый тыххæй сын ам сарæзтой дæргъвæтин ахуырады программæтæ. Æрвылаз сæ ацæуынц 480 сывæллоны. Æдæппæтæй 9 программæйы, алкæцы дæр дзы арæзт у сывæллоны зонындзинæдты æмвæзад хынцгæйæ. Æппæты кæстæртæ цæуынц "ирхæфсæн астрономи". Афтæ, хъазты хуызы, саби ног зонындзинæдтæ æнцондæрæй бамбары. Фидæны космонавттæ уал нырма пластилинæй аразынц хуры системæйы фæлгонцтæ, скæнынц космосон зарядкæ, ныв кæнынц. Фидæны сын æппæт ацы мадзæлттæ, æнæмæнг, пайда æрхæссынц. Азæй-азмæ Космонавтикæйы скъолайы ахуырты тыххæй фылдæр адæм зонынц. Йæ ахуырдзау суæвын æнцон у: хъæуы æрбахæссын уæлæмхасæн ахуыры сертификат, равзарын зæрдæмæдзæугæ программæ æмæ дарддæр саби афӕдз, кæнæ дыууæ азы дæргъы лæвар ахуыр кæндзæн. Ис дзы æркæстытæ æмæ зонадон проектты архайыны фадат дæр. Уый фæрцы фæсивæды республикæйы арæнты æдде дæр зонынц. Ныртæккæ ахæм проектмæ йæхи цæттæ кæны Стефан Подлужный. Космонавтикæйы скъолайы ахуыр кæны дыккаг аз, уыд Артекы сæрмагонд сменæйы дæр. Ныр сфæнд кодта йæ зонындзинæдтæ бафæлварын. Йæ куысты радзурдзæн, спутниктæ Зæххы орбитæмæ уадзæн транспортон космосон науы тыххæй. Ацы аз апрелы республикæйы сæргълæууæг Сергей Меняйло бафыста бадзырд Роскосмосимæ. Ацы æмгуыстады руаджы бирæ ног гæнæнтæ фæзындзæн. Зæгъæм, Машинæаразынады зонадон-иртасæн сæйраг институт скъоламæ æрæрвыста йæ экспозицийы иу хай. Ис дзы орбиталон станцæ «Мир»-ы хуызæг. 2001 азы йæ Сабыр фурды фæдæлдон кодтой. Бадзырды фæлгæты ахуыргæнджытæ июны кæрон ацæудзысты Королёвмæ ахуыртæм. Арæзт сты Роскосмосы проекты архайджытæн. Скъолай æппынæдзух вæййы дæсныйадæвдисæн ахуыртæ æмæ лекцитæ. Вячеслав Македонский йæ зонындзинæдтæ фæхай кæныны нысанимæ ссыд Мæскуыйæ. Фæсивæдæн радзырдта прграммæттæ æмæ орерацион системæтæ аразыны тыххæй. 26-æм июнæй скъолайы байгом уыдзæн «Астролагерь». Афæдзы дæргъы ахуыртæм цæуыны фадат цы сывæллæттæн нæ уыд, уыдонæн уым уыдзæн программæ базоныны фадат.