Абон у кæсагахсджыты профессионалон бæрæгбон

Абон сæ профессионалон бæрæгбоныл сæмбæлдысты кæсагахсджытæ дæр. Незамантæй нырмæ доны цæрæгойтыл цуан кæнын уыдис адæймаджы хуыздæр хиирхæфсæнтæй иу. Цы ма уа, сатæг кæм у, уынæр кæм нæ хъуысы, ахæм ран æнгуыримæ абадынæй æхсызгондæр. Кæсаг ахсыныл чи фæцалх вæййы, уыдонæн уыцы хорзæхыл фæстæдæр сæ къух сисын сæ бон нал вæййы. Сæхицæн сæрмагонд бæрæгбон дæр уымæн снысан кодтой. Фæбæрæг æй кæнынц сусæны мæйы дыккаг хуыцаубоны. Уæвгæ, æнгуыртимæ чи баизæр кæны йæхиуыл, канд уыдоны бæрæгбон нæу. Зæрдиагæй йыл сæмбæлынц, кæсаг ахсын йæ куыст кæмæн у, уыдон. Афтæ - Уæрæсейы дæр. Официалон æгъдауæй нæ бæстæйы бæрæгбоныл фыццаг хатт сæмбæлдысты 1980-æм азы. Ацы дæсныйадыл иузæрдион чи у, уыдонæн ссис иудзинад æмæ кæрæдзийы фæлтæрддзинадыл ахуыр кæныны нысан. Æнгуыр йæ къухмæ чи никуы райста, уыдонæн дæр ма æхцондзинад хæссы - кæсагæй саходын алчидæр уарзы. Уымæ гæсгæ та уæ бон у, кæмæн уæ фæнды, уымæн ацы бæрæгбоны арфæтæ дæр ракæнын. Æрдз йæ уд, йæ дзæцц кæмæн у, зæрдиагæй йæ чи уарзы, уыдон сæ «нагъ» нæ зæгъдзысты. Кæмæн куыд йæ фадат амоны, афтæ та хъуамæ архайа бæрæгбоны мадзæлтты. Уд дзы сыгъдæг цы кæны, æндæр знаггад никуыма никæмæн æрхастой. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv