Дзæуджыхъæуы сæйраг парчы рацарæзт цæуы фæткмæ гæсгæ

Дзæуджыхъæуы сæйраг парчы рацарæзт цæуы фæткмæ гæсгæ. Арæзтадон куыстытæ сбæрæг кодой Цæгат Ирыстоны культурон объектты хъахъхъæнынады комитеты разамонæг Æгайты Эмилия æмæ горæты администрацийы сæргълæууæг Фæрниаты Тамерлан. Цалцæггæнæн куыстытæн ахицæн йæ дыккаг къæпхæн. Куыд сæ баххæст кодтой, уымæн бæрнон кусджытæ хатдзæг скодтой. Арæзтадон компанийы минæвæрттæ куыд фехъусын кодтой, афтæмæй сæйраг куыстытæ иууылдæр фесты. 7 мин квадартон метрæй фылдæр равæрдтой къæй дуртæ, рухсдæттæн системæ æнæхъæнæй сног кодтой, раивтой асинтæ, дондзæуæн æмæ канализацион хæтæлтæ. Сног кодтой парчы хидтæ дæр. Иуæн дзы фæстæмæ йæ рагон хуыз разынын кодтой. Цæттæ кæнынц сыджыт, цæмæй дзы фæстæдæр бæлæстæ ныссадзой. Ныртæккæ ма æххæст кæнынц сæрдыгон эстрадайы цалцæг дæр. Культурон объекттæ хъахъхъæныны комитеты сæрдар Æгайты Эмилияйы ныхæстæм гæсгæ, Хетæгкаты Къостайы номыл парк дæр, куыд Сабырдзинады проспект, афтæ у бæрæггон объект, культурон нысаниуæг кæмæн ис, ахæм. Уый тыххæй куыстытæм комитеты рдыгæй уыд лæмбынæг цæстдард, йæхи бавæрæн дæр æм бахаста. Уæ зæрдыл уын æрлæууын кæндзытæм, Цæгат Кавказы æппæты рагондæр парктæй иуы рацарæзт æххæст кæнынц федералон проект «Горæты æнцонвадат цардархайд»-мæ гæсгæ. Ацы бынат равзæрстой горæты цæрджытæ сæхæдæг. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv