Хицауады æмбырд

З5 милуан сомы æххуыс райсдзæн республикæйы амалхъомдзинад. Уый тыххæй хицауады æмбырды абон фехъусын кодта экономикæйы рæзты министр Томайты Хъазыбег. Æхцайы фæрæзтæй арæзт æрцæудзæн инновацион-социалон хайады центр, йæ куыст кæндзæн Дзæуджыхъæуы фæсивæдон-сфæлдыстадон центр. Фæсивæдон - инновацион центр фæнд кæнынц саразын Алагиры районы дæр. Хицауады сæрдар Тускъаты Таймураз куыд фæбæрæг кодта афтæмæй сæйраг хæс у куыстытæ кæронмæ ахæццæ кæнын. Уыимæ ног куысты бынæттæ саразын дæр у ахсджиаг хъуыддаг. Хицауады æмбырды ма ныхас кодтой Цæгат Кавказы регионты райрæзтыл Уæрæсейы цы программæтæ кусынц уыдоныл. Сæ фæлгæты республикæйæн радих кæндзысты 200 милуан сомы. Министртæ ныхас кодтой ахуырадон уагдæтты цæттæдзинадыл дæр. Ног ахуырадон азмæ сæхи куыд цæттæ кæнынц, ууыл. Сæрмагонд къамис сбæрæг кæндзæн республикæйы скъолаты уавæр, æдасдзинады æмæ санитарон уавæртæн дзуапп дæттынц æви нæ. Ахуырад æмæ наукæйы министр Азымты Иринæ радзырдта куыд цæуы уыцы куыст, уый. Фæбæрæг кодта - специалисттæ нæ фаг кæнынц, уæлдайдæр та математикæйы, физикæйы æмæ фæсарæйнаг æвзæгты ахуыргæнджытæ. Мæздæджы та нæй ирон æвзаджы ахуыргæнджытæ. Скъоладзаутæ æппæтæй æвзæрдæр бæрæггæнæнтæ кæм равдыстой, уыцы скъолатæ 15 сты. Уавæр хуыздæрырдæм аивынæн дзы 8 -æн радих кæндзысты уæлæмхасæн æхца. Æдæппæтæй та Федералон программæйы фæлгæты Цæгат Ирыстон уыцы мадзæлттæн радих кæндзысты милуан сомæй фылдæр. 75 милуан сомы республикæ райста спорт æмæ культурæйы фестиваль Цæгат Кавказы адæмты хсæны руаджы. Уыцы æхцатæй спайда кæндзысты районты. Бындуронæй дзы сцалцæг кæндзысты 10 бæстыхайы. Уавæр хуыздæрырдæм ивы агропромышленнон комплексы. Хъæууон хæдзарадон кусджытæн арæзт æрцыд конкурс гранттæ райсыныл. Грантты нымæц хæццæ кæны 70 милуан соммæ. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv