Мадæлон æвзаг

Мадæлон æвзаг бахъахъхъæнын алы адæмыхаттæн дæр йæхицæй аразгæ у. Ирыстоны 34 национ-культурон æхсæнадæй æрмæстдæр 7-ы дзурынц сæхи æвзагыл. Цæмæй уавæр хуыздæр кæна, уыйтыххæй цалдæры байгом кодтой æвзаг ахуыр кæныны курсытæ. Сæ зæрдæмæ афтæ фæцыд, æмæ ма дзы кæцыдæрты бавнæлдтой фæсарæйнæгтæм дæр. Хъæппæрис æрхъуыдыгæнджытæ куыд зæгъынц, афтæмæй уымæй хъæздыг кæны адæймаджы мидварн. Гуыбаты Людæ бæлвырддæр - кæм, куыд æмæ цы мадзæлтты руаджы. Плиты Мишæйæн йæ мадæлон æвзаг ирон у. Грекъаг æвзаг ахуыр кæны, йæ зæрдæмæ кæй цæуы, уый тыххæй. Стæй ма йын уыцы хъуыддаг пайда дæр æрхæсдзæн. Плиты Мишæ: «Æз ардæм цæуын, цæмæй мæ нанаимæ дзурон. Уый нæм телефонæй æрбадзуры, уымæн æмæ йæ бон махмæ æрцæуын нæу. Стæй ма нана арæх балцы ацæуы, æмæ зоны цалдæр фæсарæйнаг æвзаджы. Ам мæ зæрдæмæ цæуы фыссын æмæ кæсын.» Софоклы æвзагыл дзурын дзы ахуыр кæнынц сæрмагонд амынддзинæдтæм гæсгæ. Цæмæй æвзаджы лыстæг сусæгдзинæдтæ сывæллæттæ хуыздæр æмбарой æмæ æнкъарой, уый тыххæй ахуыргæнджытæ рæстæгæй-рæстæгмæ ацæуынц Грецимæ сæ зонындзинæдтæ фæфылдæр кæныны тыххæй. Прометейы ис 400 адæймагæй фылдæр. Чызджытæ æмæ дзы лæппутæ канд æвзаг нæ ахуыр кæнынц. Абадынц географийы, историйы, музыкæйы, ныв кæныны урокты дæр. Фæлæ сæйрагдæр уый у, æмæ кæстæртæ хъуамæ бамбарой, адæмты культурæтæ кæй иу кæны. Афина Кяхиди, сфæлдыстадон æмæ гуманитарон ахуырады центр «Прометейы» директор: «Знон уыдыстæм педагогон институты. Ныхас дзы кодтам грекъаг мифологийы æмæ Нарты кадджыты хъайтарты иухуызон миниуджытыл.» Азербайджаны национ-культурон центры та æвзаг ахуыр кæныны курсытæ нырма æрæджы байгом сты. Цæуы йæм 20 адæймаджы. Алы урок дæр райдайы Фыдыбæстæйы гимн зарынæй. Урокты фæткæвæрды сты математикæ æмæ англисаг æвзаг. Ахуыр ма дзы кæнынц Цæгат Ирыстоны культурæ. Ам куыд зæгъынц, афтæмæй адæмыхæттыты хсæн хæлар ахастдзинæдты бындур у кæрæдзийы культурæ зонын. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv