Цæгат Иристонмæ ссыдысты мæскуыйы сывæллæтты клиникон рынчындоны специалисттæ

Арæх кæстæр фæлтæры тыхсын фæкæнынц астæуыстæджы низтæ. Ныййарджытæн ахсджиаг вæййы хъæндзинад рагагъомæ раиртасын æмæ афойнадыл дохтыры амындзинæдтæ æххæст кæнын. Консультативон æххуыс бакæнын сæ бон у Николай Пироговы номыл сывæллæтты клиникон рынчындоны специалисттæн. Дохтыртæ Цæгат Ирыстонмæ ссыдысты фыццаг хатт. Ныридæгæн федтой 30 пациенты. Фылдæр хабæрттæ радзурдзæн нæ уацхæссæг. Афæдз размæ Дзабайты Анзор æрхауди 8 метры бæрзæндæн бӕласӕй. Йæ рагъыстæджы хъултæй цалдæр, стæй йæ риуыгуыдыр асаст. Бирæ рæстæг бахъуыд лæппуйæн йе 'нæниздзинады уавæр фæхуыздæр кæнынæн. Ацыд физиотерапийæйы цалдæр курсы. Ныртæккæ Анзор æрвылбон дары сæрмагонд корсет. Дохтырты ныхæстæм гæсгæ, Анзоры сæстытæ кӕрӕдзиуыл фӕхӕцыдысты ӕмӕ байгас сты. Ныртæккæ хъæуы дарддæр дзæбæхгæнæн мадзæлттыл кусын. Медикты æххуысæй цыбыр рæстæгмæ лæппуйы бон уыдзæн спортæй архайын дæр. Анзор уымæ тынг æнхъæлмæ кæсы. Алы пациенттимæ дæр дохтыртæ лæмбынæгæй ныхас кæнынц. Амонынц сын, дарддæр сæ хи куыд дзæбæх кæнын хъæуы, уый. Уæрæсейы сывæллæтты клиникон рынчындоны специалисттæ æркастысты сывæллæттæм республикæйы алы районтæй. Дохтырты консультаци ацыд лæвар клиникæ "Здоровье"-йы. Æдæппæтæй специалисттæ æркастысты 30 пациентмæ. Хæрзаудæн акци арæзт æрцыд Уæрæсейы сывæллæтты клиникон рынчындоны хъæппæрисæй. Федералон медицинон уагдоны дохтыртæ лæвар консультацитæ дарддæр дæр араздзысты Цæгат Ирыстоны. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv